اكىم بانكتىڭ قارا تىزىمىنە ەنگەن تۇرعىنعا كومەكتەسۋگە ۋادە بەردى - الماتى وبلىسى

تالدىقورعان. قازاقپارات - الماتى وبلىسىنىڭ اكىمى اماندىق باتالوۆقا ءوڭىر تۇرعىنى جازباشا تۇردە حات جولداپ، كومەك سۇرادى، دەپ حابارلايدى قازاقپارات ءتىلشىسى.

اتى-ءجونى اتالماعان ازاماتتىڭ سوزىنشە، ول بانكتەن نەسيە العان. الايدا ول قازىر بانكتىڭ قارا تىزىمىنە ەنىپ، توسقاۋىلدار كوبەيگەن.

«مەن بانكتىڭ قارا تىزىمىنە ەندىم. قازىر جۇمىسىما بۇل جايت كەدەرگى كەلتىرۋدە. اماندىق عابباس ۇلى سىزدەن وسى ماسەلەنى شەشىپ بەرۋدى سۇرايمىن»، دەلىنگەن حاتتى وبلىس باسشىسى حالىق الدىندا وقىپ، جاۋاپتى ماماندارعا ماسەلەنى شەشۋ جونىندە تاپسىرما بەردى.

سونداي-اق تاعى ءبىر تۇرعىن جازباشا جولداعان حاتىندا كومىر ماسەلەسىن كوتەردى.

«21 -عاسىردا كومىردى قاپپەن الۋعا ءماجبۇرمىز. بۇل نە دەگەن سۇمدىق. بارلىق جاۋاپتى ماماندار جازالانسىن. ولاردى جۇمىستان شىعارۋ كەرەك»، دەلىنگەن حاتتا.

الايدا وبلىس باسشىسى مۇنداي پىكىرمەن كەلىسپەيتىنىن ايتتى. ونىڭ سوزىنشە، جاۋاپتى ماماندار تيىسىنشە جۇمىس ىستەۋدە جانە قاتتى وتىن ماسەلەسى قاتاڭ باقىلاۋدا. جانە وبلىس بويىنشا كوپقاباتتى تۇرعىن ۇيلەردە قۇبىرلاردىڭ قاتىپ قالۋ جاعدايى تىركەلمەگەن.

ايتا كەتۋ كەرەك، تالدىقورعاندا الماتى وبلىسىنىڭ اكىمى اماندىق باتالوۆتىڭ حالىق الدىنداعى ەسەبى وتۋدە.