ءاليا نازاربايەۆا: «تۇمار» - ەڭ ءىرى تاريحي كينوجوبالاردىڭ ءبىرى

استانا. قازاقپارات - ساقتاردىڭ ايگىلى بيلەۋشىسى تۇمار پاتشايىمنىڭ ءومىرى مەن ەرلىگىن سۋرەتتەيتىن فيلمدى ءتۇسىرۋ جۇمىسى ناۋرىزدا باستالادى،

 دەپ حابارلايدى «قازاقپارات» ح ا ا ءتىلشىسى «قازاق فيلم» كينوستۋدياسىنىڭ باسپا ءسوز قىزمەتىنە سىلتەمە جاساپ.

ساراپشىلار كەڭەسى الدىندا «تۇمار» فيلمى كورسەتىلىپ، ونىڭ نۇسقاسى ماقۇلداندى.

فيلمنىڭ ءوندىرىسىن ق ر  مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاق فيلم» كينوستۋدياسى «ساتاي فيلم» كينوكومپانياسىنىڭ قاتىسۋىمەن ىسكە اسىرادى. ءتۇسىرۋ توبى قورعالىم بارىسىندا دايىندىق كەزەڭىندە اتقارعان جۇمىستارى تۋرالى ايتىپ، وتپەلى كەزەڭنىڭ تۇسىرىلىمدەرى، تىگىلگەن كوستيۋمدەر، دايىندالعان رەكۆيزيتتەر جانە ءتۇسىرىلىم الاڭدارى تۋرالى بايانداپ بەردى. ناۋرىز ايىندا فيلمنىڭ نەگىزگى ءتۇسىرۋ جۇمىستارى باستالادى.

كارتينانىڭ باس پروديۋسەرى ءاليا نازاربايەۆا فيلمنىڭ ءتۇسىرۋ توبى جوبانى باستاۋعا دايىن ەكەنىن جەتكىزدى.

«بۇل ەلىمىزدىڭ كينو تاريحىنداعى ەڭ ءىرى تاريحي كينوجوبالاردىڭ ءبىرى. بارلىعىمىز دا وسى جوباعا ۇلكەن جاۋاپكەرشىلىكپەن بار كۇشىمىزدى سالىپ وتىرمىز. فيلم ارقىلى تاريحىمىز تەرەڭنەن تارتاتىنىن جانە اتا- بابالارىمىز قالىپتاستىرعان سالت- ءداستۇرىمىزدى، مادەنيەتىمىز بەز ۇلى دالا رۋحىن كورسەتىپ، ءدۇيىم كورەرمەننىڭ كوڭىلىنەن شىعاتىن تۋىندى تۇسىرەمىز دەپ ۇمىتتەنەمىن»، - دەيدى ءاليا نازاربايەۆا.

كارتينانىڭ رەجيسسەرى اقان ساتايەۆ تۇماردىڭ پاتشايىم بولۋى فيلمگە ارقاۋ بولعانىن، كينوتۋىندى تۇماردىڭ دۇنيەگە كەلۋىمەن باستالىپ، پارسىنىڭ ايگىلى پاتشاسى كيردىڭ اسكەرىمەن بولعان، اڭىزعا اينالعان شايقاسپەن اياقتالاتىنىن جەتكىزدى.

 

«ءبىزدىڭ باستى ماقساتىمىز - ب. ز. د. V- VI عاسىرلاردا ورتا ازيانى مەكەندەگەن، كۇندەلىكتى تۇرمىس- تىرشىلىگىمەن، سوعىس ساياساتى جانە ونەرىمەن الەم تاريحىندا ءوز ورنىن العان، ساق، ماسساگەتەر سىندى تايپالار قازاق حالقىنىڭ ارعى اتا- باباسى ەكەنىن دالەلدەۋ. بۇل فيلم قازاق حالقىنىڭ مادەنيەتى مەن دۇنيەتانىمىنىڭ تامىرى تىم تەرەڭدە جاتقانىن دالەلدەي تۇسەدى»، - دەيدى ول.

سونىمەن قاتار تانىمال كينورەجيسسەر جينالعاندارعا تۇسىرىلگەن كەيبىر ساحنالاردى كورسەتتى. ول تۇسىرىلىمدەردىڭ ەرەكشەلىگى جانە فيلمدەگى شايقاس كورىنىستەرىنىڭ تۇسىرىلىمدەرى قيىن بولاتىنىن ايتتى.

 «فيلمنىڭ وتپەلى كەزەڭ تۇسىرىلىمدەرى بىلتىر جەلتوقسان ايىندا الماتى وبلىسىنىڭ زارەچنىي اۋىلىنىڭ ماڭىندا جۇرگىزىلدى. ناۋرىز ايىنىڭ باسىندا «قازاق فيلمنىڭ» پاۆيلوندارىندا ءتۇسىرۋ جۇمىستارىن جالعاستىرىپ، تۇمار پاتشايىمنىڭ دۇنيەگە كەلگەنىن تۇسىرەمىز»، - دەدى رەجيسسەر.

فيلمنىڭ ءتۇسىرۋ جۇمىستارى جاركەنت، شونجا، بۋراباي مەن باياناۋىلدا تۇسىرىلەدى. جالپى ءتۇسىرۋ جۇمىستارى ءتورت ايعا سوزىلماق.

ەسكە سالا كەتسەك، بۇدان بۇرىن اتالعان تۋىندىنىڭ رەجيسسەرى اقان ساتايەۆ ءوزىنىڭ ينستاگرامداعى پاراقشاسىندا قازاقستاندا ءتۇسىرىلىپ جاتقان «توميريس» تاريحي فيلمىندە باس كەيىپكەردى سومدايتىن اكتريسانىڭ ەسىمى انىقتالعانىن جازعان بولاتىن.

اۆتور: ايان بەكەن ۇلى