داۋرەن ابايەۆ لاتىن الىپبيىنە ەنگىزىلگەن وزگەرىستەرگە قاتىستى پىكىر ءبىلدىردى
بۇگىن ەلباسى جارلىعىمەن وزگەرتىلگەن لاتىن گرافيكاسىنىڭ جاڭا نۇسقاسىنا بايلانىستى ق ر اقپارات جانە كوممۋنيكاتسيالار ءمينيسترى داۋرەن ابايەۆ وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
ءمينيستردىڭ ايتۋىنشا، بۇعان دەيىنگى نۇسقالار حالىق اراسىندا كەڭىنەن تالقىلاندى. سول سەبەپتى ماماندار ناقتى قاي باعىتتا جۇمىس ىستەۋ كەرەكتىگى انىق ءبىلىندى.
«ءالىپبيدىڭ جاڭا نۇسقاسى ونشا تالقىلانبادى دەگەن مالىمدەمەلەرمەن كەلىسپەيمىن. ويتكەنى وسى جولى ۇلتتىق كوميسسيا اياسىندا بەس- التى توپتىڭ ىشىندە ۇلكەن جۇمىس اتقارىلدى. ماسەلەن، مەن تەحنيكالىق توپتى باسقاردىم. ءبىز لاتىن ءالىپبيىنىڭ اپوستروفپەن ەنگىزۋ ماسەلەسىن زەردەلەدىك. سول پروبلەمانى كوتەردىك. ەلباسى مامانداردىڭ ايتقانىن تىڭداپ، جاڭا نۇسقانى قابىلدادى. بۇل وتە دۇرىس شەشىم بولدى»، - دەدى د. ابايەۆ جۋرناليستەرگە بەرگەن سۇحباتىندا.
وسى ورايدا مينيستر لاتىن گرافيكاسىندا اپوستروفتى قولدانۋدىڭ قيىنشىلىقتارىن دا اتاپ ءوتتى.
«مىسالى، اپوستروف ارنايى بەلگى رەتىندە كەلەدى. ونى قولدانعاندا تاڭبالاردىڭ اراسى اشىلىپ كەتەدى. سونىڭ سالدارىنان عالامتوردا ماتىندەردى ىزدەۋ ماسەلەسى قيىندايدى. ەندى، ءوزىنىڭ الگوريتمى بار عوي. ەلباسى حالىقتىڭ وسى پىكىرىن دە ەسكەردى. سوندىقتان لاتىننىڭ جاڭا نۇسقاسى قولدانۋ جاعىنان ءتيىمدى. سوسىن ءبىر ماسەلەنى ەسكەرۋ كەرەك، لاتىن ءالىپبيىنىڭ ءمىنسىز نۇسقاسى جوق. ونى ءبارىمىز جاقسى بىلەمىز. مەنىڭشە، قازىرگى نۇسقا ورىندى ءارى زامان تالابىنا ساي كەلەدى. وندا عالىم لينگۆيستەردىڭ پىكىرى عانا ەمەس، IT مامانداردىڭ كەڭەستەرى دە ەسكەرىلدى»، - دەپ اتاپ كورسەتتى د. ابايەۆ.
