ۇكىمەت باسشىسى اتباساردىڭ جىلدا سۋ استىندا قالۋ پروبلەماسىن تۇبەگەيلى شەشۋدى تاپسىردى

استانا. قازاقپارات - بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر پرەمەر- ءمينيسترى باقىتجان ساعىنتايەۆ اتباساردىڭ جىلدا سۋ استىندا قالۋ پروبلەماسىن تۇبەگەيلى شەشۋدى تاپسىردى، دەپ حابارلايدى قازاقپارات.

«اتباساردىڭ جاعدايى قالاي بولماق؟ نە كۇتەمىز؟ ءۇيىندى توپىراق سۋدى ۇستاي الا ما؟ جىلدا اقشا بولەمىز. بۇرىن اقشا قۇمعا كەتتى دەسەك، ەندى سۋعا كەتىپ جاتىر. تۇرعىنداردىڭ ۇندەۋىن وقىدىم. ولار ءبىزدى جوبالايتىندىعىمىزعا، قۇرىلعىلار، دامبالار، توپىراق ۇيىندىلەرىن سالاتىندىعىمىزعا سەنبەيدى دە. ولار ءبارىبىر سۋدى ۇستامايدى، ءبارىن شايىپ كەتىپ، ۇيلەر، ونىڭ ىشىندە ءبىلىم بەرۋ نىساندارى سۋدىڭ استىندا قالادى. دامبا سالعانشا سۋ بارمايتىن باسقا جەردەن ءۇي سالىپ بەرىڭدەر» دەيدى. ميللياردتعان قارجىنى نەسىنە جۇمساپ جاتىرسىز؟»، - دەدى ۇكىمەت باسشىسى اقمولا وبلىسىنىڭ اكىمى مالىك مىرزالينگە قاراتا.

ءوڭىر باسشىسى پرەمەردىڭ سىنىمەن تولىقتاي كەلىسەتىندىگىن باسا ايتتى.

«باقىتجان ءابدىر ۇلى، بۇل دۇرىس پىكىر. 9 شاقىرىمدىق دامبا سالۋعا 10 ميلليارد تەڭگە قارجى كەتەدى. ال 1830 ادام تۇراتىن 530 ءۇيدى باسقا جاققا كوشىرىپ، ۇيلەردى سالۋعا 3-5 ميلليارد تەڭگە كەتەدى. شىعىننىڭ مولشەرى تومەن بولادى»، - دەدى مالىك مىرزالين.

وسى رەتتە باقىتجان ساعىنتايەۆ ءبىر رەت دۇرىس شەشىم قابىلداپ، بۇل ماسەلەنى تۇبەگەيلى جابۋ قاجەتتىگىن قاتاڭ ەسكەرتتى.

«اۋا-رايى بولجامى بويىنشا وڭىردە قاردىڭ مولشەرى از بولادى. ءبىراق بىزدە قاردىڭ نەگىزگى مولشەرى اقپان ايىنىڭ سوڭى مەن ناۋرىز ايىنىڭ سوڭىندا جاۋادى. ءبىز كوكتەم ەرتە كەلەدى دەپ جورامالداپ وتىرمىز. ءبىراق ول ۇزاققا سوزىلادى. بۇل سۋ تاسقىنىنىڭ قاۋپىن تومەندەتەدى. باقىتجان ءابدىر ۇلى، ءتيىستى جۇمىستار جاسالىپ جاتىر. ەشكىمگە بوساڭسۋعا جول بەرگەن جوقپىز. جاباي وزەنى مەن اتباسار قالاسىندا سۋ تاسقىنى بولماس ءۇشىن جۇمىس جاساپ جاتىرمىز. وتكەن جىلى سۋدىڭ مولشەرى وتە جوعارى بولدى. ءبىراق وسى جىلى مۇنداي جاعداي بولمايتىن شىعار»، - دەدى مالىك مىرزالين.