دەنيس تەن سپورتتاعى كارەراسىن اياقتاي ما؟

الماتى. قازاقپارات - پحەنچحان وليمپياداسىندا ونەر كورسەتكەن فريستايل- موگۋل مەن فريستايل- اكروباتشى قىزدارمەن بىرگە دەنيس تەن دە الماتىعا كەلدى. سپورتشىلاردى اۋەجايدان سپورت اكادەمياسىنىڭ ستۋدەنتتەرى، وقىتۋشىلارى، ارىپتەستەرى، جانكۇيەرلەر كۇتىپ الدى، دەپ حابارلايدى قازاقپارات ءتىلشىسى.

دەنيس تەن ءدۇبىرلى دوداعا جەڭىس ءۇشىن ەمەس، جاي عانا قاتىسۋ ءۇشىن بارعانىن ايتتى. بۇعان ونىڭ ءۇستى- ۇستىنە قاباتتاسقان جاراقاتتارى سەبەپ بولعان.

«بۇل مەنىڭ ءتورتىنشى وليمپيادام. مەن ءۇشىن ءوز باعدارلاماممەن ونەر كورسەتۋدىڭ ءوزى ۇلكەن مارتەبە. مەندە سەنىمنەن گورى كۇدىك باسىم بولدى. ءبىراق سوندا دا تاۋەكەلگە بارىپ قاتىستىم. مەن ۇلكەن جارىسقا قاتىسقانىما مۇلدە وكىنبەيمىن»، - دەدى دەنيس تەن.

قىسقا باعدارلاما ناتيجەسى بويىنشا قازاقستاندىق مانەرلەپ سىرعاناۋشى 70,12 بالمەن 27-ورىنعا تابان تىرەگەن بولاتىن. ءوز باعدارلاماسىندا سپورتشى كۇردەلى ەلەمەنتتەر جاسامادى. سوندىقتان قازىلار ونىڭ ەڭبەگىن ورتاشا باعالادى.

سپورتشى بولاشاقتاعى جوسپارىمەن ءبولىستى.

«مەندە ءبىر اپتا ءۇزىلىس بولادى. فيزيوتەراپيا قابىلداپ بولعان سوڭ باپكەرىم ەكەۋمىز بىرىگە وتىرىپ كەلەسى وليمپياداعا قاتىسامىز با جوق پا، سونى شەشەمىز. الەم چەمپيوناتىنا قاتىسۋ- قاتىسپاۋىمىز دا ەكىتالاي. الايدا مەنەن باسقا ول جاقتا قازاقستاننىڭ نامىسىن قورعايتىن ەشكىم جوق»، - دەدى دەنيس تەن.