بەيبىت شۇمەنوۆ قانات يسلامنىڭ پروموۋتەرى بولدى

استانا. قازاقپارات - جەڭىلىپ كورمەگەن قازاقستاندىق بوكسشى قانات يسلام (25-0, 20 ك و) جاڭا پروموۋتەر الدى، دەپ حابارلايدى Sports.kz BoxRec.com. سايتىنا سىلتەمە جاساپ.

جاڭا پروموۋتەر WBA نۇسقاسى بويىنشا ءبىرىنشى اۋىر سالماقتاعى ەكس الەم چەمپيونى بەيبىت شۇمەنوۆ (17-2, 11 ك و). شۇمەنوۆ سونىمەن قاتار وزبەكستاندىق بوكسشى راۆشان حۋداينازاروۆتىڭ (17-1, 13 ك و) دا ءىسىن جۇرگىزەتىن بولادى. يسلامنىڭ بۇرىنعى پروموۋتەرى نەلسون لوپەس بولاتىن.

ايتا كەتەيىك، قانات يسلام جەلتوقسان ايىندا-اق شۇمەنوۆتىڭ جەتەكشىلىگىمەن جاتتىققان بولاتىن.

قاڭتار ايىنىڭ باسىندا بەيبىت شۇمەنوۆ استانادا باسپا ءسوز- ءماسليحاتىن وتكىزىپ، كاسىبي سپورتتاعى كارەراسىن جاڭعىرتاتىنىن ايتقان بولاتىن. وسىعان دەيىن دارىگەرلەر وعان جاتتىعۋلاردىڭ بىرىندە كوزىنەن العان اۋىر جاراقاتىنان سوڭ سپورتپەن اينالىسۋدى توقتاتۋعا كەڭەس بەرگەن ەدى. وسى باسپا ءسوز ءماسليحاتى كەزىندە شۇمەنوۆ پروموۋتەرلىك قىزمەتپەن اينالىسۋدى جوسپارلاپ وتىرعاندىعىن مالىمدەگەن ەدى.