اقتوبەدەگى اتىشۋلى اۆتوبۋس ورتىنە قاتىستى تىڭ دەرەكتەر شىقتى
بۇل تۋرالى ءبىر توپ ماجىلىسمەندەردىڭ دەپۋتاتتىق ساۋالىنا ق ر ىشكى ىستەر ءمينيسترى قالمۇحانبەت قاسىموۆتىڭ بەرگەن جاۋابىندا ايتىلعان، دەپ حابارلايدى «قازاقپارات» ح ا ا ءتىلشىسى.
«مينيسترلىكتىڭ تەرگەۋ دەپارتامەنتى اقتوبە وبلىسىندا وزبەكستان رەسپۋبليكاسىنىڭ 52 ازاماتىنىڭ اۆتوبۋستا كوز جۇمۋىنا قاتىستى فاكتى بويىنشا ق ر ق ك 345-بابىنىڭ 4-بولىگى جانە ق ر ق ك 348-بابىنىڭ 4-بولىگى نەگىزىندە تەرگەۋ جۇرگىزۋدە»، - دەلىنگەن جاۋاپتا.
ءى ءى م رەسمي جاۋابى سول قايعىلى وقيعاعا قاتىستى ءبىرشاما دەرەكتىڭ بەتىن اشقان.
«تەرگەۋ اۆتوبۋستىڭ «شىمكەنت - سامارا» اۆتوجولىنىڭ 1068 شاقىرىمىندا تەحنيكالىق اقاۋعا بايلانىستى ودان ءارى قوزعالۋدى توقتاتقانىن انىقتادى. بۇل تۋرالى توتەنشە قىزمەتتەرگە حابار بەرمەي، جولاۋشىلاردىڭ قاۋىپسىزدىگىنە شارالار قابىلداماي، 2015 -جىلعى 26 -ناۋرىزىندا ق ر ينۆەستيتسيالار جانە دامۋ مينيسترلىگى بەكىتكەن «اۆتوموبيل كولىگىمەن جولاۋشىلار مەن باگاجدى تاسىمالداۋ قاعيدالارىن» بۇزا وتىرىپ، اۆتوبۋس جۇرگىزۋشىلەرى جانىپ تۇرعان دانەكەرلەۋىش شامنىڭ كومەگىمەن كولىك قۇرالىنىڭ سالونىن جىلىتا باستاعان. وندا اشىق ىدىستان ابايسىزدا توگىلگەن بەنزيننەن ءورت شىققان»، - دەپ جاۋاپ بەرەدى ءى ءى م.
قالمۇحانبەت قاسىموۆتىڭ جاۋابىنا سۇيەنسەك، قازىرگى ۋاقىتتا قاماۋدا ۇستاۋ بۇلتارتپاۋ شاراسىن تاڭدالا وتىرىپ، اۆتوبۋستىڭ جۇرگىزۋشىلەرى ف. م. پەرنەبەكوۆ، ن. ا. قىرعىزبايەۆ پەن ب. م. تاناتوۆ قىلمىستىق جاۋاپكەرشىلىككە تارتىلۋدا. تەرگەۋ بارىسىندا تەحنيكالىق اقاۋى بار اۆتوبۋستى جولعا شىعارۋدىڭ سەبەپتەرى، جاعدايلارى مەن نەگىزدەرى انىقتالاتىن بولادى.
ق ر ق پ ك 200-بابىنىڭ تارتىبىنە سايكەس قىلمىستىق ءىستى تەرگەۋ ءىسى اياقتالعاننان كەيىن مەملەكەتتىك جاۋاپتى ورگاندارعا شارالاردى قابىلداۋ بويىنشا ءتيىستى ۇسىنىستار جولدانادى.
ەسكە سالا كەتسەك، بۇعان دەيىن ق ر پارلامەنتى ءماجىلىسىنىڭ دەپۋتاتتارى ق ر باس پروكۋرورى قايرات قوجامجاروۆ پەن ىشكى ىستەر ءمينيسترى قالمۇحانبەت قاسىموۆقا اقتوبە وبلىسىندا اۆتوبۋستىڭ ورتەنۋىنەن 52 ادامنىڭ اجال قۇشۋىنا كىنالىلەردىڭ بارلىعىن تابۋدى سۇراپ، دەپۋاتتىق ساۋال جولداعان بولاتىن.
ايتا كەتەيىك، 18 -قاڭتار كۇنى سامارا- شىمكەنت تاسجولىندا اۆتوبۋس ورتەنىپ، 52 ادام قازا بولدى.
كەيىننەن ورتەنگەن اۆتوبۋس يەسىنىڭ ليتسەنزياسى بولماعانى انىقتالدى.
