ورتالىق ازيادا عارىشتى زەرتتەۋ ورتالىعىن اشۋ جوسپارلانۋدا

استانا. قازاقپارات - ق ر قورعانىس جانە اەروعارىش ونەركاسىبى مينيسترلىگى دەلەگاتسياسىنىڭ (ق ا ءو م) قىرعىزستاننىڭ ۇلتتىق عىلىمدار اكادەمياسىنا (ۇ ع ا) ساپارى اياسىندا جەتەكشى عالىمدارمەن، عارىشكەرلەرمەن، قازاقستاننىڭ حالىق باتىرى ايدىن ايىمبەتوۆپەن كەزدەسۋ وتكىزىلدى، دەپ حابارلايدى «قازاقپارات» ح ا ا ءتىلشىسى.

«قازاقستان عارىش ساپارى» ۇلتتىق كومپانياسىنىڭ عارىش تەحنولوگيالارى بويىنشا ۆيتسە- پرەزيدەنتى ايدىن ايىمبەتوۆ قازاق عارىشىنىڭ بۇگىنگى جەتىستىكتەرى تۋرالى، عارىش تەحنولوگيالارىنىڭ ەلدىڭ بۇگىنگى ەكونوميكاسى مەن قاۋىپسىزدىگىنە قولدانۋ مۇمكىندىكتەرى تۋرالى ايتىپ بەردى.

قىرعىزستان ۇعا ۆيتسە-پرەزيدەنتى وسمون توعىساقوۆ عارىش مونيتورينگىنىڭ تابيعي رەسۋرستارعا باعا بەرۋ، تۇقىم سەبۋ ساپاسى مەن سىبايلاس جەمقورلىقتى باقىلاۋعا دەيىنگى سالادا تاجىريبەلىك ماڭىزى ارتىپ كەلە جاتقانىن اتاپ ءوتتى.

«ءبىز ورتالىق ازيادا بىرىككەن عارىش زەرتتەۋ ورتالىعىن قۇرۋدىڭ مۇمكىندىكتەرىن تالقىلادىق. ونىڭ جۇمىسىنا ءبىزدىڭ عالىمدار دا تىكەلەي قاتىسا الادى. سونداي-اق، بىرلەسكەن زەرتتەۋدى ارى قاراي تالقىلاۋ ءۇشىن 2018 -جىلى ءوتۋى جوسپارلانىپ وتىرعان اكادەميالىق ينۆەستيتسيالىق- يننوۆاتسيالىق فورۋمعا قازاق ارىپتەستەرىمىزدى شاقىرىپ وتىرمىز»، - دەدى و. توعىساقوۆ.

قىرعىزستاننىڭ عالىمدارى قازاقستاندىق عارىشكەر ايدىن ايىمبەتوۆتى ەرەكشە ىقىلاسپەن كۇتىپ الدى. ايدىن ايىمبەتوۆ ءوز كەزەگىندە ءىرى عىلىمي الەۋەتكە يە قىرعىزستاننىڭ عىلىم اكادەمياسىمەن عارىش سالاسىندا سەرىكتەستىك ورناتۋ مۇمكىندىگىن ايتىپ ءوتتى. ونىڭ ايتۋىنشا، بىرلەسكەن جوبالاردىڭ ايتارلىقتاي كەلەشەگى بار.