وسكەمەندەگى حاليفا التاي مەشىتى: يمام گولليۆۋد اكتەرلەرىنىڭ مەشىتتە بولۋىنا قاتىستى پىكىر ءبىلدىردى
«قازاقپارات» ءتىلشىسى وسى وقيعاعا بايلانىستى باس يمام ەرمەك قاجى مۇقاتايعا حابارلاسىپ، پىكىرىن ءبىلدى.
يمام بۇل وقيعا الەۋمەتتىك جەلىدە قىزۋ تالقىلانىپ جاتقانى بولماسا، شاريعاتقا قايشى ەشتەڭە بولماعانىن ايتادى.
«الەۋمەتتىك جەلىگە تاراعان اقپاراتتىڭ بارلىعىن ءبىز يسلامنىڭ اسقاق ابىرويىن ويلاعان جاناشىرلىق دەپ قابىلدادىق. اركىمنىڭ تۇسىنىك-تانىمى، دەڭگەيى ءارتۇرلى عوي. سوندىقتان، ەشكىمگە وكپە ساقتاپ وتىرعان جوقپىز. مەشىتتىڭ ەسىگى كەز كەلگەن ادامعا اشىق. اكتەرلەردىڭ ءبارى عيمارات ىشىندە شاريعات زاڭدىلىقتارىن ساقتاپ ءجۇردى. شاريعاتتىڭ ەشبىر شارتى بۇزىلماعانىن رەسمي مالىمدەيمىن. ءدىنىمىزدىڭ ابىرويىنا اراشا ءتۇسىپ، ءوز ورەسىنە ساي ءۇن ءبىلدىرىپ جاتقان تىلەۋلەستەرىمىزدىڭ بارىنا قۋاندىق» - دەيدى ەرمەك قاجى.
سونىمەن قاتار، ەرمەك مۇقاتاي گولليۆۋد ماماندارى اتسالىسىپ جاتقان جوباعا ءمۇفتياتتىڭ ەش قاتىسى جوق ەكەنىن اتادى.
«مەشىتكە كينو ءتۇسىرۋشى توپتىڭ كەلەتىنى بىزگە ەكى كۇن بۇرىن حابارلاندى. ۇسىنىس وبلىستىق ءدىن ىستەرى باسقارماسىنان تۇسكەن بولاتىن. وعان ءمۇفتياتتىڭ ەش قاتىسى جوق. جوبا جەرگىلىكتى اكىمدىكتىڭ قولداۋىمەن جۇزەگە اسىپ جاتىر. ءوڭىردىڭ رۋحاني الەمىن سيپاتتاۋ ءۇشىن مەشىتتىڭ تىنىس- تىرشىلىگىمەن تانىستىرۋ كەرەك بولعان ەكەن. سوندىقتان ءبىز بۇل ۇسىنىسقا كەلىستىك» - دەيدى يمام.
وسى وقيعادان كەيىن قوعام اراسىندا مەشىتكە وزگە ءدىن ۇستانۋشىلاردىڭ، شوۋ-بيزنەس وكىلدەرىنىڭ، شەتەل ازاماتتارىنىڭ كەلىپ-كەتۋىن، عيمارات اۋماعىندا فوتو جانە ۆيدەو تۇسىرىلىمدەر جاساۋدىڭ جەكە ەرەجەسىن بەكىتۋ كەرەكتىگى ايتىلا باستادى. ەرمەك قاجى قازاقستان زايىرلى مەملەكەت بولعاندىقتان، كەز كەلگەن ادامنىڭ مەشىتكە كەلىپ-كەتۋى ادەپ- يبا پرينسيپتەرىمەن، مەشىتتىڭ ىشكى ەرەجەسىمەن رەتتەلەتىنىن ايتادى.
«ءدال قازىر مەشىت اۋماعىندا سۋرەتكە ءتۇسىپ، ۆيدەو جاساۋعا تىيىم جوق. مەشىتتە ءوزىن- ءوزى ۇستاۋدىڭ جالپىعا ورتاق ەرەجەسى ءىلىنىپ تۇر. سونى ساقتاسا جەتىپ جاتىر. گولليۆۋد اكتەرلەرى دە سول ەرەجەمەن ءجۇرىپ- تۇردى. دەگەنمەن ءدىني قاتىناس تا قوعاممەن بىرگە دامىپ وتىرۋى كەرەك. وعان ءدىني قىزمەت جانە ءدىني بىرلەستىكتەر تۋرالى زاڭعا وزگەرىستەر ەنىپ جاتقانى دالەل» - دەيدى ول.
«شىعىستىڭ برەندى» دەگەن اتپەن ءتۇسىرىلىپ جاتقان دەرەكتى توپتامادا مەشىت ومىرىنەن قانداي كادرلار بەرىلەتىنىنەن مەشىت وكىلدەرى حابارسىز. ءدىن قىزمەتكەرى ءتۇسىرۋشى توپتىڭ بۇل تۋرالى وزدەرىمەن اقىلداسپاعانىن ايتىپ وتىر.
ەرمەك قاجى قاراماعىنداعى مەشىت قىزمەتكەرىنىڭ باي لين ەسىمدى اكتەردىڭ قاسىندا تۇرعان اتىشۋلى سۋرەتىنە قاتىستى پىكىرىن ءبىلدىردى. الەۋمەتتىك جەلىدە اتالمىش سۋرەتتى سالعان ادامداردى سوت ارقىلى جاۋاپقا تارتۋ قاجەت دەگەن ۇسىنىستار ايتىلعان بولاتىن. يمام مەشىت تاراپىنان ەشقانداي شاعىم تۇسىرىلمەيتىنىن ايتادى.
«يسلام - كەشىرىم ءدىنى. سوندىقتان وبلىستىق مەشىت تاراپىنان ەشكىمگە ارىز- تالاپ تۇسىرمەيمىز. ونىڭ ۇستىنە بۇل جەردە ءدىني قىزمەتكەردىڭ جەكە باس قۇقىعى تاپتالىپ وتىر. ءبىز ارىپتەسىمىزبەن سويلەستىك. ۇجىم دا، مەشىتكە كەلۋشىلەر دە ونى وتباسى قۇندىلىقتارىنا ادال، دىنىنە بەرىك جان رەتىندە بىلەدى. شەتەلدىك مەيماندارمەن جۇرگەن قاربالاستا ءتۇسىپ قالعان كەزدەيسوق سۋرەتتى سان-ساققا جۇرگىرتكەندەردى وزدەرىنىڭ ار سوتىنا تاپسىرايىق. دەگەنمەن، بۇل ارىپتەسىمىزدىڭ جەكە قۇقىعى. ءبىز ەشكىمدى جازالاۋعا، قاتەسى ءۇشىن جاۋاپقا تارتۋعا قۇلىقتى ەمەسپىز. ەڭ باستىسى، سۋرەتكە ات قويىپ، ايدار تاعۋشىلار ءوز قاتەلىكتەرىن تۇسىنگەنى كەرەك»، - دەدى ول.
اۆتور: ەسىمجان ناقتىباي
