جۇرەگىڭىزگە جۇك تۇسىرمەڭىز
جۇرەك- قان تامىرلارى اۋرۋلارىنىڭ جيىلەپ كەتۋى عالامدىق ماسەلەگە اينالدى. سوندىقتان ءار ادام قان قىسىمىن، قان قۇرامىنداعى حولەستەرين مەن قانت دەڭگەيىن انىقتاۋعا ءمان بەرگەنى ءجون. ويتكەنى كۇيگەلەكتىك، دۇرىس تاماقتانباۋ، ىشىمدىك پەن تەمەكىگە ۇيىرسەكتىك، قوزعالىستىڭ ازدىعى جۇرەكتىڭ وزگەرىسكە ۇشىراۋىنا اكەلەدى. بۇل اۋرۋدىڭ العاشقى بەلگىلەرى - جۇرەك پەن كەۋدە تۇسىنىڭ اۋىرسىنۋى مەن شانشۋى، تامىر سوعىسىنىڭ ءجيى سوعۋى. الايدا ادامداردىڭ كوبى وعان ۋاقىتشا جاعداي دەپ قارايدى دا، ءمان بەرە بەرمەيدى ەكەن. ەگەر تىنىس الۋىڭىز قيىنداپ، ەنتىگۋ پايدا بولسا نەمەسە اياعىڭىزدا ىسىك پايدا بولعان جاعدايدا، دەرەۋ دارىگەرگە بارعان ءجون. شىن مانىندە، كۇتىمى دۇرىس جۇرەكتىڭ قىزمەتى 150 جىلعا دەيىن قاۋقارلى.
قازىرگى تاڭدا جۇدىرىقتاي جۇرەگىمىز ەرتە ۇزىلەتىن بولدى. كۇللى الەمدى الاڭداتىپ وتىرعان جۇرەك- قان تامىرلارى اۋرۋلارىنان كوز جۇمۋ كورسەتكىشى ءبىزدىڭ ەلىمىزدە دە ءبىرىنشى ورىندا تۇر. جۇرەك اۋرۋىنا كىنالى - ەڭ اۋەلى ازاماتتاردىڭ ءوزى. ىشىمدىك پەن تەمەكى، كۇيزەلىس، دۇرىس تاماقتانباۋ، ءبىر ورىندا قوزعالماۋ - ءبارى جۇرەككە سالماق تۇسىرەدى. ءسويتىپ، اعزامىزداعى قان اينالىمى وزگەرىسكە ۇشىرايدى. شەكتەن تىس سەمىرۋ دە جۇرەكتىڭ دۇرىس جۇمىس ىستەمەۋىنە اكەلەدى. سوندىقتان سالاۋاتتى ءومىر سالتىن ساقتاپ، تاماقتانۋ مادەنيەتىن مەڭگەرگەن ءجون. جۇرەك- قان تامىرلارى اۋرۋىن ەمدەۋ ەكى باعىتتا جۇزەگە اسادى. ءبىرىنشىسى - العاشقى كومەك كورسەتۋ بولسا، ەكىنشىسى - اۋرۋدىڭ الدىن الۋ. ول بويىنشا حالىق اراسىندا جۇرەك- قان تامىرلارى اۋرۋىنا سەبەپ بولاتىن فاكتورلاردىڭ دەڭگەيىن تومەندەتۋ جانە اۋرۋعا شالدىققان ناۋقاستاردىڭ جاعدايىن تۇراقتى باقىلاۋدا ۇستاۋ. ياعني، اۋرۋدىڭ ودان ءارى دەندەپ كەتۋىنە جول بەرمەۋ ماڭىزدى. جۇرەك- قان تامىرلارى اۋرۋىنىڭ ەڭ باستى فاكتورلارى شىلىم شەگۋ. ونىڭ قانشالىقتى زيان ەكەنىن ەلدىڭ ءبارى بىلەدى. ال قويعاننان كەيىنگى پايداسى وتە كوپ. ماسەلەن، تەمەكى شەكپەسەڭىز، 20 مينۋتتان كەيىن ارتەريالىق قان قىسىم تومەندەپ، تامىر سوعىسى قالپىنا كەلەدى. ءبىر كۇننەن كەيىن جۇرەك ۇستاماسى قاۋپى تومەندەيدى. ال 12 اپتادان كەيىن قان قىسىمى جاقسارادى. ءبىر جىلدان كەيىن يشەميالىق جۇرەك اۋرۋىمەن كەلەتىن قاۋىپ ەكى ەسەگە تومەندەيدى.
حولەستەرين. قان قۇرامىندا حولەستەريننىڭ كوبەيگەنى دۇرىس ەمەس. بۇل تۇبىندە كورونارلىق ارتەرياعا اكەلەدى. اۋرۋدىڭ الدىن الۋ ءۇشىن مايلى تاعامداردان باس تارتقان ءجون. قان قىسىمى. قان قىسىمىنىڭ جوعارىلاۋىنىڭ% 27 كورونارلىق ارتەريالاردىڭ يشەميالىق اۋرۋلارىنا، % 42 ينسۋلتقا اكەلەدى. سول ءۇشىن ارتىق سالماقتان ارىلىپ، سالاۋاتتى ءومىر سالتىن ۇستانعان دۇرىس. اشى، تۇزدى، مايلى تاعامداردى جەمەي، ەسەسىنە تابيعي ونىمدەردى تۇتىنعان پايدالى.
دەرەككوز: astana-akshamy.kz
