سەمەيلىك ماتەماتيك ا ق ش ۇكىمەتىندە قالاي جۇمىس ىستەپ ءجۇر

 استانا. قازاقپارات - امەريكادا قازاق ۇلتىنىڭ ءبىرقاتار وكىلى تۇرادى. ولاردىڭ دەنى دارىگەر، كاسىپكەر، بانكير، سونداي- اق ا ق ش- تىڭ فەدەرالدىق ۇكىمەتىندە قىزمەت ەتەتىن قانداستارىمىز دا بار.

بۇل تۋرالى حابار 24 حابارلايدى.

رايىمجان مارسەكوۆ ەسىمدى ازامات - قازاقتان شىققان تۇڭعىش زاڭگەر ءارى پۋبليتسيست. ول بۇرىنعى سەمەي وبلىسىندا تۋعان. 1902 -جىلى سانكت- پەتەربۋرگتىڭ يمپەراتورلىق ۋنيۆەرسيتەتىن ءتامامداپ، كەيىن وتانىندا سوت سالاسىندا قىزمەت ەتەدى. قوعام قايراتكەرى جانە «الاش» قوزعالىسىنا قاتىسۋشى رايىمجان مارسەكوۆ 1937 -جىلى اعايىندارىمەن بىرگە ءولىم جازاسىنا كەسىلەدى. بۇل سۇم ساياساتتىڭ سالدارى ەدى. ەسكى جىلداردىڭ ەستەلىگى بولعان اتاسنىنىڭ سۋرەتىن قازىر مەريلەند شتاتىندا تۇراتىن رايىمجان مارسەكوۆتىڭ شوبەرەسى ساقتاپ وتىر.

«مەن سەمەيدە تۋىپ، ماسكەۋدەگى حالىقتار دوستىعى ۋنيۆەرسيتەتىندە ماتەماتيكا ماماندىعى بويىنشا ءبىلىم الدىم. وقۋ ورنىن ءتامامداعان سوڭ كانديداتتىق ديسسەرتاتسيامدى قورعاپ، الماتىداعى قازاق ۇلتتىق ۋنيۆەرسيتەتىندە قىزمەت ەتتىم» ، - دەيدى ا ق ش اكتۋارلار پالاتاسىنىڭ مۇشەسى ماحمۇد ساعىندىق.

ال ماحمۇدتىڭ جۇبايى جاننا ساعىندىق تا ماتەماتيك. قانداستارىمىزعا امەريكاعا كوشىپ كەلگەن باستاپقى جىلدار وتە قيىن بولعان. جوعارى وقۋ ورىندارىندا فرانسۋزشا، نەمىسشە وقىعانىمەن اعىلشىنشا بىلمەيدى. سوندىقتان ەڭ الدىمەن وسى جاقتىڭ ءتىلىن ۇيرەنىپ، كەيىن قىزمەتكە ورنالاسقان.

«ءبىز ءبارىن باسىنان باستادىق. ماحمۇد دوكتورانت بولدى. اۋەلگى كەزدە وسى جاقتا ءبىلىم الىپ، ءتىلدى ۇيرەنگەن سوڭ ەلىمىز قازاقستانعا قايتىپ بارامىز دەگەن وي بولعان. 2007 -جىلى «وتانىمىزعا كەتەمىز» دەپ تۇبەگەيلى شەشىم قابىلدادىق. ءبىز ماتەماتيكپىز. ال ول ماماندىقتى مەڭگەرگەندەرگە وسى امەريكادا سۇرانىس جوعارى بولدى. سوسىن ويلانا كەلىپ، وسىندا قالاتىن بولدىق» ، - دەيدى ا ق ش ۇكىمەتىنىڭ وكىلى جاننا ساعىندىق.

2009 -جىلى ماحمۇد پەن جاننا ا ق ش- تاعى دەنساۋلىق ساقتاۋ سالاسى رەفورماسىن ازىرلەۋگە ءارى ونىڭ قارجىلاندىرىلۋىن ساراپتاۋعا قاتىسادى. وسى كەزدە ولاردىڭ ءبىلىم، بىلىكتىلىگى كورىنىپ، ەرەكشە كوزگە تۇسكەن.

«ماحمۇد جاسى 65 تەن اسقان قارت ادامدارعا ارنالعان الەۋمەتتىك ساقتاندىرۋدى ەسەپتەۋمەن اينالىساتىن توپتا جۇمىس ىستەيدى. ال مەن از قامتىلعان وتباسىلاردى ساقتاندىرۋعا قاتىستى سۇراقتارعا جاۋاپ بەرەمىن» ، - دەيدى ا ق ش ۇكىمەتىنىڭ وكىلى جاننا ساعىندىق.

 ساعىندىقوۆتار جانۇياسى امەريكانىڭ بارلىق 50 شتاتىنا ەسەپ جۇرگىزىپ، ازاماتتاردىڭ جاعدايلارى بويىنشا بولجام جاسايدى. ماسەلەن، جۋىردا كەيىپكەرلەرىمىز فەدەرالدىق ۇكىمەتتەگى ارىپتەستەرىمەن بىرگە ەلدە تۇماۋعا شالدىعىپ، ناشاقورلىققا اۋەستەنگەندەر تۋرالى اقپارات جيناعان.

 «امەريكادا وپيويدتى ەسىرتكىنى قولدانۋشىلاردىڭ قاتارى قازىر ءوسىپ كەلەدى. بۇل ۇكىمەتتىك دەڭگەيدە قارالاتىن وتە وزەكتى ماسەلەگە اينالدى» ، -  دەيدى ا ق ش ۇكىمەتىنىڭ وكىلى جاننا ساعىندىق.

ماحمۇد تا، جاننا دا قازىر اياققا نىق تۇرعان. جەمىستى قىزمەت ەتىپ، بيىك جەتىستىكتەرگە جەتىپ وتىر. حالىقارالىق قارجى سەرتيفيكاتىن يەلەنگەن وتاعاسى بۇگىندە امەريكان- بريتان اكتۋارلار پالاتاسىنىڭ مۇشەسى. ال جاننا ا ق ش- تىڭ ۇزدىك مەملەكەتتىك قىزمەتكەرى اتانىپ، ماراپاتقا يە بولعان. وسىلايشا جىراق تا جۇرسە دە ەرلى زايىپتىلار جۇرەگىمەن وتانىنا بايلانعان. ونى سۇحبات بارىسىندا دا انىق اڭعاردىق.

«قازاقتىڭ دارقان دالاسىن اڭسايمىن. ەلىمە كەلگەن كەزدە ءاردايىم پويىزبەن ءجۇرىپ، اينالاعا كوز تاستايمىن. سودان ءنار العانداي بولامىن. جۋىردا نۇرسۇلتان نازاربايەۆتىڭ ا ق ش- قا جاساعان رەسمي ساپارى دا بىزگە قۋات بەردى. قازاقستان مەن امەريكانىڭ اراسىندا مۇنداي دوستىق قارىم- قاتىناستىڭ بەكىگەنىنە وتە قۋانىشتىمىز» ، - دەيدى ا ق ش اكتۋارلار پالاتاسىنىڭ مۇشەسى ماحمۇد ساعىندىق.

وسىلايشا امەريكا ۇكىمەتىندە دە ءبىلىمى مەن بىلىگى قاتار ۇشتاسقان قانداستارىمىز قىزمەت ەتەدى. بۇل مۇحيتتىڭ ارعى بەتىندەگى قازاقتاردىڭ جەتىستىگى.