استانادا مۇقتاجدارعا نان تەگىن تاراتىلۋدا

 استانا. قازاقپارات - استانادا حالىقتىڭ الەۋمەتتىك جاعىنان وسال توپتارىن قولداۋعا باعىتتالعان اكتسيالار جۇرگىزىلىپ جاتىر، دەپ حابارلايدى قازاقپارات ەلوردا اكىمدىگىنىڭ سايتىنا سىلتەمە جاساپ.

اكىمدىكتىڭ مالىمەتىنشە، «رۋحاني جاڭعىرۋ» باعدارلاماسى بويىنشا استانادا كومەككە مۇقتاج ازاماتتاردى تەگىن تۇردە ازىق- تۇلىكپەن قامتۋ بويىنشا قايىرىمدىلىق اكسياسى وتكىزىلىپ جاتىر. ءار اپتا سايىن ۇيىمداستىرۋشىلار «شاپاعات» كوممۋنالدىق بازارىندا، جەڭىس داڭعىلىنداعى 55-ۇيدە، ءى. ەسەنبەرلين كوشەسىندەگى 2\1-ۇيدە؛ ع. مۇستافين كوشەسىندەگى 13-ۇيدە ورنالاسقان «5 مينۋت» سۋپەرماركەت جەلىسىنىڭ ءۇش دۇكەنىندە تەگىن 120-200 بولكە نان تاراتادى.

اتالمىش اكسيا حالىقتىڭ الەۋمەتتىك جاعىنان وسال توپتارىنا، قارت ادامدارعا قولداۋ كورسەتۋگە باعىتتالعان.

 سونداي- اق، «قايىرىمدىلىق. دوبروتا» جوباسى جۇزەگە اسىرىلۋدا. «كوكتال» كولىك بولشەكتەر امبەباپ بازارى ماڭىندا (كوكتال، 18) الەۋمەتتىك جاعىنان از قامتىلعان وتباسىلار ءۇشىن ارنايى بۋتيك اشىلدى. ونداعى تاۋارلارعا باعا قويىلماعان. كەز- كەلگەن ازاماتتار بۋتيككە مۇقتاج جاندار الىپ كەتەتىن كيىم- كەشەك، اياق كيىمدەر، ويىنشىقتار مەن كىتاپتاردى اكەلىپ قويا الادى.