نۇرسۇلتان نازاربايەۆ: تەرروريزممەن ءار مەملەكەت جەكە- جەكە كۇرەسە المايدى

 استانا. قازاقپارات - تەرروريزم مەن ەكسترەميزمگە قارسى مەملەكەتتەر تەك قانا بىرلەسىپ كۇرەسە الادى.

CCTV تەلەارناسىنا سۇحبات بەرگەن قازاقستان پرەزيدەنتى نازاربايەۆ وسىنداي ۇستانىمىن ءبىلدىردى، دەپ حابارلايدى «قازاقپارات» ح ا ا ءتىلشىسى.

CCTV تەلەارناسىنىڭ ءتىلشىسى مەملەكەت باسشىسىنا سۇحباتىندا 2018 -جىلدىڭ قاڭتار ايىندا قازاقستان تۇڭعىش رەت ب ۇ ۇ قاۋىپسىزدىك كەڭەسىنىڭ ءتوراعاسى بولعانىن اتاپ ءوتتى.

«قازاقستاننىڭ ءتوراعالىق ەتۋى ءسىزدىڭ حالىقارالىق دەڭگەيدەگى ابىرويىڭىز بەن قازاقستان ديپلوماتياسى جەتىستىگىنىڭ ارقاسى ەكەنى ءسوزسىز. ب ۇ ۇ قاۋىپسىزدىك كەڭەسىنىڭ ءتوراعاسى رەتىندە قازاقستان قاي باعىتقا باسىمدىق بەرگەلى وتىر؟ » - دەپ سۇرادى تەلەارنا ءتىلشىسى.

 نۇرسۇلتان نازاربايەۆ جاۋابىن تاۋەلسىزدىك العانىنا بار- جوعى 26 جىل تولىپ وتىرعانىنا قاراماستان، قازاقستاننىڭ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە سايلانۋ قۇرمەتىنە يە بولىپ وتىرعانىنان باستادى.

 «وتكەن اپتادا مەن نيۋ- يوركتا بولىپ، قاۋىپسىزدىك كەڭەسىنىڭ وتىرىسىندا ءتوراعالىق ەتتىم. ءبىز يادرولىق قارۋسىزداندىرۋ مەن مەملەكەتتەر اراسىنداعى سەنىم تاقىرىبىندا ديسكۋسسيا وتكىزدىك. ءبىرشاما جاڭا شارالار ۇيىمداستىردىق. ءبىزدىڭ ماقسات پەن مىندەت -  ورتالىق ازيا ايماعىنداعى بەيبىتشىلىك پەن تىنىشتىق ءۇشىن جۇمىس جۇرگىزۋ، اۋعانستاندا تىنىشتىق ورناماي تۇرعاندىقتان، ۇجىمدىق تۇرعىدا اۋعانستانعا التەرناتيۆتى ءوندىرىس قۇرۋ جولىندا قالاي كومەستەسۋگە بولاتىنىن شەشىپ، جاعدايدى تۇراقتاندىرۋ. سەبەبى، ول ءبىزدىڭ كورشىمىز» ، - دەدى پرەزيدەنت.

 مەملەكەت باسشىسىنىڭ ايتۋىنشا، قازاقستان اۋعانستان ارقىلى پاكىستانعا، ءۇندىستانعا شىعا الادى.

«الايدا ىشكى قاۋىپسىزدىكتەگى (اۋعانستاندا - اۆت. ) السىزدىك مۇناي- گاز قۇبىرلارى مەن اۆتوكولىك جولدارىنىڭ ءوتۋىن قامتاماسىز ەتە الماي وتىر. سوندىقتان، اۋعانستاننىڭ ىشىندە تۇراقتىلىق ورناۋدا ءبىزدىڭ مۇددەمىز ورتاق. ءبىز وسى باعىتتا جۇمىس جۇرگىزدىك» ، - دەدى ەلباسى.

 نۇرسۇلتان نازاربايەۆ قازاقستان قازىرگى تاڭدا وسى جۇمىستى اتقارىپ وتىرعانى ءۇشىن ماقتان تۇتاتىنىن ايتتى.

«ول وتە جوعارى باعالانىپ جاتىر. قازاقستاننىڭ باستاماسىمەن ب ۇ ۇ- عا مۇشە بارلىق مەملەكەتتەردىڭ وكىلدەرى كابۋلعا بارىپ، ەل ىشىندەگى جاعدايدى زەردەلەپ قايتتى. وكىنىشكە قاراي، سوڭعى جىلدارى السىرەپ قالعان مەملەكەتتەر اراسىنداعى سەنىم ماسەلەسى تەرروريزم مەن ەكسترەميزمگە قارسى كۇرەس باعىتىندا وتە ماڭىزدى. ونىمەن تەك قانا بىرلەسە كۇرەسۋگە بولادى. ءاربىر مەملەكەت جەكە- جەكە كۇرەسە المايدى. تەرروريزم - قاي جەردە بولماسىن باس كوتەرەتىن زۇلىمدىق. ونىڭ فرونتىندا ەشقانداي شەكتەۋ جوق. قاشان جانە قاي جەردە بۇرق ەتە تۇسەتىنىن بىلمەيسىڭ.. . سوندىقتان، مەملەكەتتەردىڭ ارنايى قىزمەتتەرىنىڭ بايلانىسى وتە ماڭىزدى. مىنە، وسى باعىتتا ءبىز جۇمىس جۇرگىزىپ جاتىرمىز» ، - دەدى نۇرسۇلتان نازاربايەۆ.

ايان بەكەن ۇلى