قازاقستاندا جۇمىسسىزدار سانى ازايىپ كەلەدى - ءمادينا ءابىلقاسىموۆا
بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى ءمادينا ءابىلقاسىموۆا ۆەدومستۆونىڭ كەڭەيتىلگەن القا جيىنىندا ءمالىم ەتتى، دەپ حابارلايدى قازاقپارات.
«2017 -جىلدىڭ قورىتىندىسى بويىنشا ەڭبەك نارىعىنىڭ كورسەتكىشتەرى تولىعىمەن جاقسارتىلدى. جۇمىسسىزداردىڭ سانى سوڭعى 10 جىل ىشىندە 180 مىڭعا ازايدى. جۇمىسسىزدىق دەڭگەيىنىڭ تۇراقتى تۇردە تومەندەپ كەلە جاتقانى بايقالادى. بۇگىنگى تاڭدا بۇل كورسەتكىش 4,9 پايىزدى قۇرايدى. ايەلدەر مەن جاستار اراسىنداعى جۇمىسسىزدىق دەڭگەيى 5,4 جانە 4,2 پايىزدى قۇرايدى. بۇل كورسەتكىشتەر رەسپۋبليكامىزدىڭ تاۋەلسىزدىگى كەزەڭىندەگى ەڭ تومەن دەڭگەي»، - دەدى ءمادينا ءابىلقاسىموۆا ەڭبەك جانە حالىقتى الەۋمەتتىك قورعاۋ مينيسترلىگى القاسىنىڭ كەڭەيتىلگەن وتىرىسىندا.
ءمينيستردىڭ ايتۋىنشا، بۇگىندە قازاقستانداعى جۇمىس كۇشى 8 ميلليون 980 مىڭ ادامدى قۇرايدى. جالدامالى جۇمىسكەرلەردىڭ سانى 1,8 پايىزعا وسسە، ءوزىن-ءوزىن جۇمىسپەن قامتىعان ازاماتتاردىڭ سانى 4,5 پايىزعا ازايعان.
سونداي-اق، قازاقستانداعى ءبىر جۇمىسشىنىڭ ورتاشا ايلىق جالاقىسى 147 مىڭ 988 تەڭگەگە دەيىن نەمەسە 3,6 پايىزعا وسكەن.
2017 -جىلدىڭ 11 ايىنداعى باعالاۋ بويىنشا تۇرعىنداردىڭ جان باسىنا شاققانداعى نومينالدىق تابىسى 6 پايىزعا ءوسىپ، 79 مىڭ 727 تەڭگەنى قۇراعان.
ايتا كەتەيىك، استانادا ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ كەڭەيتىلگەن القا ءماجىلىسى ءوتىپ جاتىر. وندا 2017 -جىلى اتقارىلعان جۇمىس قورىتىندىلارى جانە ەلباسى جولداۋىندا ايتىلعان تاپسىرمالاردى جۇزەگە اسىرۋ تاقىرىبى تالقىلانۋدا.
