قازاقستاندا جاڭادان مۇناي وڭدەۋ زاۋىتىن سالۋ كوزدەلۋدە - قانات بوزىمبايەۆ

ورال. قازاقپارات - قازاقستاندا جاڭا مۇناي وڭدەۋ زاۋىتىن سالۋ كوزدەلۋدە. بۇل تۋرالى ب ق و اكىمى التاي كولگىنوۆتىڭ ەسەپتىك كەزدەسۋىنە قاتىسقان ق ر ەنەرگەتيكا ءمينيسترى قانات بوزىمبايەۆ ءمالىم ەتتى، دەپ حابارلايدى «قازاقپارات» ءتىلشىسى.

ءمينيستردىڭ سوزىنە قاراعاندا، بۇل وسىنداي ءتورتىنشى زاۋىت بولماق. وسىعان بايلانىستى جۇمىس توبى قۇرىلدى. ينۆەستورلاردى تارتا وتىرىپ، جول كارتاسى ازىرلەندى. الدىمەن تەحنيكالىق- ەكونوميكالىق نەگىزدەمە جاسالادى. سونىڭ نەگىزىندە قاي وڭىردە سالىناتىنى، قۋاتتىلىعى قانداي، نەندەي ونىمدەر شىعاراتىنى بەلگىلى بولادى.

 «قازىر ناقتى ايتا المايمىز. اقتوبەدە بولا ما، اقتاۋ نە شىمكەنتتە سالىنا ما، ازىرگە بەلگىسىز. نەگىزدەمە بىتكەننەن كەيىن قازان- قاراشادا انىقتالادى. باتىس قازاقستان وبلىسىنا قاتىستى ماسەلەگە كەلسەك، قاراشىعاناقتا «كوندەنسات» ا ق- نىڭ قۋاتتىلىعى جىلىنا 80 مىڭ تونناداي ءونىم وندىرەتىن جاڭا زاۋىتى بار. الداعى ەكى- ءۇش ايدىڭ ىشىندە ديزەل وتىنىن شىعاراتىن قوندىرعىنى ىسكە قوسسا، ونى ءبىز كەستەگە ەنگىزەمىز. سول باعىتقا مۇنايدى اتىراۋدان جىبەرەتىن بولامىز. سوندا باتىس قازاقستان وبلىسى دا بەنزين، ديزەل وتىنى سىندى ونىمدەرمەن قامتاماسىز ەتىلەتىن بولادى»، دەدى ق. بوزىمبايەۆ.