ءشامشى قالداياقوۆتىڭ «كۋبان» ەرەكشە مۇراسى ۇلتتىق مۋزەيگە تاپسىرىلدى

استانا. قازاقپارات - «ۇلتتىق مۋزەيگە سىي- تارتۋ» شاراسى قولعا الىنعالى بەرى مۇراجاي قورى ەلىمىزدىڭ قوعام جانە مادەنيەت قايراتكەرلەرىنىڭ نەبىر قۇندى جادىگەرلەرىمەن تولىعۋدا. ەندى ولاردىڭ قاتارىنا قازاق ءۆالسىنىڭ كورولى اتانعان ءشامشى قالداياقوۆتىڭ پيانينوسى دا قوسىلدى.

استانا اقشامى گازەتىنىڭ جازۋىنشا، مۋزەي قورىنا تاپسىرىلعان دۇنيە - ۇلى سازگەر ءشامشى قالداياقوۆتىڭ «كۋبان» دەپ اتالاتىن پيانينوسى. بۇل مۋزىكالىق اسپاپتى كومپوزيتورعا 1965 -جىلدىڭ 4 - اقپانىندا شىمكەنت جاستارى سىيعا تارتقان.

جالپى، بالا جاسىنان مۋزىكاعا قۇمار بولعان ءشامشى پيانينودا ويناۋمەن قاتار دومبىرا شەرتىپ، سىرنايدى دا تارتقانى ايتىلادى. اۋىلىنا كەلگەن سىعان جىگىتىنەن ماندولينانى ساتىپ العانى جايلى دا دەرەك بار. قازاقستاننىڭ ەڭبەك سىڭىرگەن قايراتكەرى التىن يمانبايەۆا ءشامشى مەكتەپپەن قوشتاسۋ كەشىندە لاتيف ءحاميديدىڭ «بۇلبۇل» ءانىن ماندولينامەن ورىنداپ، اۋىلداستارىنىڭ الدىندا مەرەيى وسكەنىن جازادى.

ايتا كەتەيىك، كومپوزيتور بۇل مۋزىكالىق اسپاپتى سىيعا العان جىلى قازاقستان كومسومولى سىيلىعىمەن ماراپاتتالدى. ال 1991 -جىلى حالىق ءارتىسى اتاندى. كومپوزيتوردىڭ عۇمىرى وسىدان 26 جىل بۇرىن وسى اقپان ايىندا ءۇزىلدى. ءومىرىنىڭ سوڭعى جىلدارى كيگەن قاراكول بورىگى دە استاناداعى مۋزەيدە ساقتاۋلى.

ءشامشى قالداياقوۆ (1930-1992 ج ج) - اسا كورنەكتى سازگەر، ءان جانرىنىڭ ايگىلى مايتالمانى، قازاقستان مادەنيەتىنە ەڭبەگى سىڭگەن قايراتكەر، وسى زامانعى قازاق ەستراداسىنىڭ نەگىزىن سالۋشىلاردىڭ ءبىرى، قازاقستاننىڭ حالىق ءارتىسى.

وڭتۇستىك قازاقستان وبلىسىنىڭ قىزىلقۇم اۋدانىندا دۇنيەگە كەلدى. بالا كەزىنەن بويىنداعى بار تالانتىن القالى جيىن، الامان بايگەلەردە كورسەتە ءبىلدى. 1950 -جىلدان باستاپ شىعارماشىلىقپەن تۇبەگەيلى تۇردە شۇعىلداندى.

 كومپوزيتوردىڭ «اق ەركە - اق جايىق»، «ارىس جاعاسىندا»، «سىر سۇلۋى»، «جارقىرايدى جەزقازعان»، «قارقارالى»، «مويىنقۇمدا»، «مەنىڭ قازاقستانىم»، «تەڭىزدە - تولقىندا»، «اقماڭدايلىم»، «اق بانتيك»، «كەشىكپەي كەلەم دەپ ەڭ»، «ءانىم سەن ەدىڭ» سىندى ورنى ەرەكشە 300-گە جۋىق ءانى بار.