ماعجان تۋرالى زامانداستارىنىڭ دەگەندەرى

 استانا. قازاقپارات - ماعجاننىڭ اقىندىعى مەن سىرشىلدىعىنا جۇسىپبەك ايماۋىت ۇلى جەكە ماقالا ارناعان بولاتىن. ەشكىمگە ۇقسامايتىن دارالىعى جايىندا مۇحتار اۋەزوۆ تە ايتقان. ماعجان تۋرالى باسقا دا زامانداستارىنىڭ ايتقان ەستەلىكتەرىنەن توپتاما ۇسىنامىز.

 قازاق ادەبيەتىنە ماعجان كىرگىزگەن جاڭالىقتارى جوق ەمەس. ماعجان - كۇشتى اقىن. ءوز ويىن، ءوز تىلەگىن ۇقتىرا بىلەتىن اقىن. م. دۋلاتوۆ

ماعجاننىڭ اقىندىعىن سىناۋعا ءبىلىمىمىز، كۇشىمىز كامىل جەتەدى دەپ ايتا المايمىز. تولىق سىناۋ ءۇشىن، ونىڭ الدى- ارتىن وراپ، ءورىسىن تارىلتىپ شىعارلىق سەگىز قىرلى، نەگىزدى ءبىلىم كەرەك. ج. ايماۋىت ۇلى

 سىرشىل اقىنداردىڭ ىشىندە ولەڭنىڭ ىشكى سۋرەتىنە ءسوزىنىڭ سىرتقى كەستەسى ۇيلەسىپ، ماڭىزدى بولىپ شىعاتىن - ماعجاننىڭ ولەڭدەرى. ج. ايماۋىت ۇلى

 تابيعاتتى ماعجاننان كوپ، ونان ارتىق سۋرەتتەگەن قازاق اقىنى كەمدە كەم.

ماعجان - تابيعات قوينىندا تۋىپ، تابيعات اناسىنىڭ باۋىرىندا وسكەن ناعىز تابيعات ۇلى. ج. ايماۋىت ۇلى

ماعجان - ەلىكتەگىش اقىن. ەلىكتەۋ اقىنعا ءمىن ەمەس، قانداي كۇشتى اقىندار دا الدىڭعى اقىندارعا ەىلكتەمەي جازا الماعان. ج. ايماۋىت ۇلى

 باسقا جۇرت ءوز ونەرپازدارىمەن ماقتانسا، قازاق ادەبيەتى دە ءبىر كەزدە سۋرەتشىلىك جونىنەن ماعجانىمەن ماقتانۋىندا ءسوز جوق. ماعجاننىڭ اقىندىق كۇشى، سوزگە ەركىندىگى، سۋرەتشىلدىگى «باياندا» تولىق كورىندى. ج. ايماۋىت ۇلى

ماعجان تەرەڭ ويدىڭ اقىنى ەمەس، نازىك سەزىمنىڭ، ءتاتتى قيالدىڭ اقىنى، ول كەدەيدىڭ ەمەس، ۇلت اقىنى. ج. ايماۋىت ۇلى

ماعجان - ەڭ الدىمەن، سىرشىل اقىن. ول جۇرەكتىڭ قوبىزىن شەرتە بىلەدى، ونىڭ جۇرەگىنەن جاس پەن قانى ارالاس شىققان ءتاتتى سوزدەرى وزگەنىڭ جۇرەگىنە ءتاتتى ۋ سەبەدى. ماعجان نە جازسا، سىرلى، كوركەم، ءساندى جازادى. وقۋشىنىڭ جۇرەگىنە اسەر بەرە المايتىن قۇرعاق ولەڭدى، جابايى جىردى ماعجاننان تابا المايسىز. ج. ايماۋىت ۇلى

 تالايلار ماعجان بولعىسى كەلەدى، ءبىراق بولا المايدى، ءسىرا، تالانتىندا كەمىستىك بولاتىن شىعار. ك. كەمەڭگەر ۇلى

ماعجاندى سۇيەمىن. ەۋروپالىعىن، جارقىراعىن، اشەكەيلىگىن سۇيەمىن. قازاق اقىندارىنىڭ قاراقوردالى اۋىلىندا تۋىپ، ەۋروپاداعى مادەنيەت پەن سۇلۋلىق سارايىنا وراتىلىپ بارىپ جايلاۋى جاراسقان ارقا قىزىن كورىپ، سەزگەندەي بولامىن. ماعجان - كۋلتۋراسى زور اقىن. م. اۋەزوۆ

ادەبيەت - ادەبيەت ءۇشىن دەگەن تاڭبا ايقىن بولماي، ءنارلى ادەبيەت بولۋعا جول جوق. سوندىقتان بۇگىنگى كۇننىڭ بار جازۋشىسىنىڭ ىشىنەن كەلەشەككە بوي ۇرىپ، ارتقى كۇنگە انىق قالۋعا جارايتىن ءسوز - ماعجاننىڭ ءسوزى. ودان باسقامىزدىڭ بارىمىزدىكى كۇماندى، وتە سەنىمسىز دەپ بىلەمىن. م. اۋەزوۆ

Massaget.kz