پارا الىپ سوتتالعان ەرلان ءبىلال اكتەرلىك جۇمىسىن جالعاستىرا بەرمەك
بۇل تۋرالى مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ جاڭا باسشىسى اسحات ماەميروۆ ايتتى، دەپ حابارلايدى الماتى ارناسى.
بۇعان دەيىن قازاقپارات اتالعان تەاترعا جاڭا ديرەكتور تاعايىندالعاندىعى تۋرالى حابارلاعان بولاتىن.
اسحات ماەميروۆ جاڭا قىزمەتكە تاعايىنداۋ تۋرالى بۇيرىق شىققاننان كەيىن، ۇلى تۇلعالاردىڭ باسىنا بارىپ زيارات ەتكەنىن دە جاسىرمادى. ال ونەردە ارىپتەس، ومىردە دوسى تەاتردىڭ بۇرىنعى باسشىسى ەرلان ءبىلالدىڭ قارا شاڭىراقتىڭ ساحناسىنداعى جۇمىسىن جالعاستىرا بەرەتىندىگىن باسا ايتتى. ويتكەنى، ەرلان بىلالدەن باسقا اكتەر سومداي المايتىن ونىڭ وزىندىك رولدەرى بار.
«ەرلان وسى تەاترداعى نەگىزگى رەپەرتۋارلاردى باستى كەيىپكەرلەردى سومدايدى. ول مۇحتار اۋەزوۆتىڭ «اباي جولىنداعى» اباي، ونى ەرلاننان باسقا ەشكىم ويناي المايدى. ول دۋلات يسابەكوۆتىڭ «جاۋ جۇرەگىندەگى» بالۋان شولاق، يسرايل ساپاربايەۆتىڭ «سىعان سەرەناداسىنداعى» ءشامشى بەينەسى، اكىم تارازيدىڭ «اقىن پەرىشتە ماحابباتتاعى» مۇقاعالي بەينەسى. ەرلاننىڭ ءبىرىنشى اللا تاعالا بەرگەن تالانتى، ارتيستيزم، كاسىبي شەبەرلىگى، ناعىز ونەردەگى تۇلعا. سوندىقتان تۇلعا تەاتردان ءبولىنىپ ەشقايدا كەتپەيدى»، - دەدى مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى.
ەسكە سالا كەتەيىك، الماتىدا م. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ بۇرىنعى ديرەكتورى، بەلگىلى اكتەر ەرلان ءبىلال 1,5 ميلليون تەڭگە كولەمىندە پارا الىپ جاتقان جەرىنەن ۇستالعان بولاتىن.
سونداي-اق، ەرلان ءبىلالعا قاتىستى سوت ۇكىمى شىقتى.
