قازاقستان فەرمەرلەرى قىتايعا قانداي ونىمدەرىن ەكسپورتتاي الادى

استانا. قازاقپارات - قىتايعا اۋىل شارۋاشىلىعى ونىمدەرىنىڭ ەكسپورتى 30 پايىزعا ارتتى. بۇل تۋرالى اۋىل شارۋاشىلىعى مينيسترلىگىنىڭ كەڭەيتىلگەن القا ماجىلىسىندە رۇستەم قۇرمانوۆ ءمالىم ەتتى، دەپ حابارلايدى قازاقپارات.

 «جالپى، وتاندىق ازىق- تۇلىكتىڭ نەگىزگى ونىمدەرىمەن قامتاماسىز ەتۋ 80 پايىزدان استى. 2017 -جىلدىڭ 11 ايىندا اۋىل شارۋاشىلىعى ءونىمى مەن قايتا وڭدەلگەن تاۋارلاردىڭ ەكسپورتى 10 پايىزعا ارتتى. وسى ورايدا ونىمدەردى ەكسپورتقا شىعارۋ گەوگرافياسى كەڭەيىپ كەلەدى. قازىرگى كەزدە قىتايلىق نارىق بالىق، قوي مەن جىلقى، ومارتا شارۋاشىلىقتارى، بيداي ءارى بۇرشاق داقىلدارى ونىمدەرى ءۇشىن اشىق. ناتيجەسىندە، اگروونەركاسىپتىك كەشەن ونىمدەرىنىڭ ق ح ر- عا ەكسپورتى 30 پايىزعا ۇلعايدى»، - دەدى قۇرمانوۆ.

ونىڭ سوزىنە قاراعاندا، بىرىككەن اراب امىرلىكتەرىنە ءىرى قارا مالدى تاسىمالداۋ بويىنشا شەكتەۋلەر جويىلدى.

«يرانعا راپس تۇقىمىنىڭ ەكسپورتى 5,9 ەسەگە، ارپا - 1,4 ەسەگە، بۇرشاق داقىلدارى 1,9 ەسەگە ارتتى»، - دەدى ۆيتسە- مينيستر.

اۆتور: رۋسلان عابباسوۆ