قازاقستان تەمىر جولىنىڭ باسشىسى تالگونىڭ كەمشىلىگىن اتادى

استانا. قازاقپارات - ق ر ينۆەستيتسيالار جانە دامۋ ءمينيسترى جەڭىس قاسىمبەك قازاقستاندا جاسالعان «تالگو» جۇردەك پويىزىنىڭ كەمشىلىگىن جويۋدى تاپسىردى، دەپ حابارلايدى قازاقپارات ءتىلشىسى.

«قاڭتار ايىندا -40 گرادۋستىق قاتتى ايازدار بولدى. سول كەزدە «تالگو» - عا قاتىستى ءبىرقاتار قيىندىقتار بولدى. اتالعان ماسەلەنى قالاي شەشەمىز؟»، - دەدى ج. قاسىمبەك مينيسترلىكتىڭ بۇگىنگى القا ماجىلىسىندە.

«قازاقستان تەمىر جولى» ۇلتتىق كومپانياسىنىڭ پرەزيدەنتى قانات الپىسبايەۆتىڭ ايتۋىنشا، اتالعان ماسەلەنى ول جەكە باقىلاۋدا ۇستاپ وتىر.

«اۋا تەمپەراتۋراسى تومەندەگەن كەزدە ەكى وقيعا بولدى. ول كەزدە پنيەۆماتيكالىق باقىلاۋ جۇيەسى ىستەن شىققان بولاتىن. قازىرگى كەزدە ءبىز وسى ماسەلەنى ءوندىرۋشى كومپانيامەن بىرگە پىسىقتاپ جاتىرمىز. ارينە، الداعى ۋاقىتتا وندايعا جول بەرمەۋگە تىرىسامىز»، - دەپ اتاپ كورسەتتى ق. الپىسبايەۆ.

ايتا كەتەيىك، اعىمداعى جىلى 4 - قاڭتاردا استانا- لەنينوگورسك باعىتىنداعى №375 پوەزدان تەحنيكالىق اقاۋلىق شىعىپ، «تالگو» ۆاگوندارىندا اۋا تەمپەراتۋراسى كۇرت تومەندەپ كەتكەن ەدى. سونىڭ سالدارىنان 228 جولاۋشىنى باسقا پوەزعا اۋىستىرۋعا تۋرا كەلدى. تالگونىڭ ورنىنا كۋپە- ۆاگوندارى بار №153 سەمەي- استانا پوەزى جولعا شىعارىلعان بولاتىن.

اۆتور: ارمان اسقاروۆ