ەلباسى قايرات ءابدىراحمانوۆتى قابىلدادى

استانا. قازاقپارات - كەزدەسۋ بارىسىندا قايرات ءابدىراحمانوۆ مەملەكەت باسشىسىنا سىرتقى ىستەر مينيسترلىگىنىڭ قازىرگى قىزمەتى، سونداي-اق الداعى كەزەڭگە ارنالعان جوسپارلارى جونىندە مالىمدەدى، دەپ حابارلايدى «قازاقپارات» ح ا ا اقورداعا سىلتەمە جاساپ.

ەلباسى ازياداعى ءوزارا ءىس-قيمىل جانە سەنىم شارالارى كەڭەسى مەن كاسپي ماڭى مەملەكەتتەرى باسشىلارىنىڭ سامميتىنە دايىندىق بارىسىنداعى ۇيىمداستىرۋشىلىق جانە مازمۇندىق ماسەلەلەرگە باسا نازار اۋداردى.

نۇرسۇلتان نازاربايەۆ ۇكىمەتتىڭ كەڭەيتىلگەن وتىرىسىندا بەرىلگەن تاپسىرمالار تۇرعىسىنان العاندا، سىرتقى ساياسات ۆەدومستۆوسى ەكونوميكامىزدىڭ باستى سالالارىنا شەتەلدىك ينۆەستيسيا تارتۋ ۇدەرىسىندە ەرەكشە ءرول اتقاراتىنىن اتاپ ءوتتى.

قازاقستان پرەزيدەنتى كەزدەسۋ سوڭىندا ءبىرقاتار ناقتى تاپسىرما بەردى.