وڭتۇستىك كورەيانىڭ ەكس- پرەزيدەنتىنىڭ قۇربىسى جيىرما جىلعا سوتتالدى

استانا. قازاقپارات - سەۋل سوتى سەيسەنبى كۇنى كورەيا رەسپۋبليكاسىنىڭ بۇرىنعى پرەزيدەنتى پاك كىن حەنىڭ بالا كۇنگى قۇربىسى چحۆە سۋن سيلدى جيىرما جىلعا باس بوستاندىعىنان ايىردى،

 دەپ حابارلايدى قازاقپارات رەنحاپ اگەنتتىگىنە سىلتەمە جاساپ.

چحۆە سۋن سيل سىبايلاس جەمقورلىققا قاتىستى ايىپتالعان سوڭ، ەل تاريحىنداعى تۇڭعىش ايەل پرەزيدەنت پاك وتستاۆكاعا كەتكەن ەدى.

سوتتىڭ شەشىمىمەن چحۆە سۋن سيل 18 ميلليارد ۆون (16.6 ميلليون ا ق ش دوللارى) مولشەرىندە ايىپپۇل دا تولەيتىن بولدى.

62 جاستاعى ايەل 2016 -جىلدىڭ قاراشاسىندا سىبايلاس جەمقورلىق جاسادى، بۇرىنعى پرەزيدەنتپەن بايلانىسىن اسىرا پايدالاندى دەگەن ايىپپەن ۇستالدى. ءىس ماتەريالدارىنا قاراعاندا، چحۆە وڭتۇستىك كورەيانىڭ 50-گە جۋىق كونگلومەراتتارىن جالپى 77,4 ميلليارد ۆون مولشەرىندەگى قارجىنى ءوزى باقىلايتىن قورلارعا اۋدارۋعا ماجبۇرلەگەن.

پروكۋرورلار وعان 25 جىلعا جابۋ جانە 118 ميلليارد ۆون مولشەرىندە ايىپپۇل تولەۋ جازاسىن بەرۋدى سۇراعان، ال چحۆە وزىنە قويىلعان ايىپتاردىڭ ەشقايسىسىن مويىندامادى.

بۇرىنعى پرەزيدەنت جانە چحۆە اينالاسىنداعى جانجال ەلدە جاپپاي نارازىلىقتارعا سەبەپ بولىپ، حالىق پرەزيدەنتتىڭ وتستاۆكاعا كەتۋىن تالاپ ەتكەن بولاتىن. وسى تالاپتى 2017 -جىلدىڭ ناۋرىزىندا كونستيتۋتسيالىق سوت تا قولداعان.