ايگىلى «دوس- مۇقاسان» توبىنىڭ ءانشىسى ينستيتۋت باسشىسى بولىپ تاعايىندالدى

استانا. قازاقپارات - ديرەكتورلار كەڭەسىنىڭ شەشىمىنە سايكەس، سەيسمولوگيا ينستيتۋتىنىڭ باسشىسى قىزمەتىنە دوسىم سۇلەيەۆ تاعايىندالدى.

بۇعان دەيىن ينستيتۋت باسشىسى بولعان انۆار بورانبايەۆ 12 -اقپان كۇنى قىزمەتىنەن كەتتى.

بۇل تۋرالى ينستيتۋتتىڭ باسپا ءسوز قىزمەتىنەن حابارلاندى.

دوسىم سۇلەيەۆ جاڭا قىزمەتىنە 24 -اقپاننان باستاپ كىرىسپەك.

ايتا كەتەيىك، دوسىم سۇلەيەۆ 50 جىلدىق تاريحى بار ايگىلى «دوس- مۇقاسان» انسامبلىنىڭ نەگىزىن قالاعان. ول 1947 -جىلدىڭ 7 -ناۋرىزىندا وڭتۇستىك قازاقستان وبلىسىندا دۇنيەگە كەلگەن. لەنين اتىنداعى قازاق پوليتەحنيكالىق ينستۋتىنىڭ اۆتوماتيكا جانە ەسەپتەۋ تەحنيكاسى فاكۋلتەتىن ءتامامداعان. قازاق ەلىنە ايگىلى انسامبلدى ستۋدەنتتىك شاعىندا قۇرعان.

جوعارى وقۋ ورنىن ءتامامداعان سوڭ تەحنيكالىق كيبەرنەتيكا كافەدراسىنىڭ ينجەنەرى قىزمەتىن اتقارعان. ال 1974 -جىلى ماسكەۋدەگى بولات جانە قورىتپا ينستيتۋتىنىڭ اسپيرانتۋراسىنا وقۋعا جىبەرىلگەن. 1978 -جىلدان باستاپ ۇستاز، لەنين اتىنداعى قازاق پوليتەحنيكالىق ينستيتۋتى پارتكوم حاتشىسىنىڭ ورىنباسارى قىزمەتتەرىن اتقارعان.

1986 -جىلدىڭ ساۋىرىنەن - الماتىداعى ەنەرگەتيكالىق ينستيتۋتتىڭ وقۋ ءىسى بويىنشا پرورەكتورى، ال 2008 -جىلدان باستاپ قانىش ساتپايەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ قۇرمەتتى رەكتورى قىزمەتىن اتقارىپ كەلدى.