داۋرەن ابايەۆ سيفرلاندىرۋدىڭ پايداسىن قاراپايىم مىسالمەن ءتۇسىندىرىپ بەردى
بۇل تۋرالى بۇگىن ۇكىمەت وتىرىسىندا ق ر اقپارات جانە كوممۋنيكاتسيالار ءمينيسترى داۋرەن ابايەۆ ءمالىم ەتتى، دەپ حابارلايدى «قازاقپارات» ح ا ا ءتىلشىسى.
«ۇكىمەتتىڭ كەڭەيتىلگەن وتىرىسىندا قويىلعان مىندەتتەردەن كەيىن اقپارات جانە كوممۋنيكاتسيالار مينيسترلىگى مەملەكەت باسشىسى قويعان تاپسىرمالاردى ورىنداۋعا كىرىسىپ كەتتى. بىرىنشىدەن، سيفرلاندىرۋ بويىنشا تۇسىندىرمە جۇمىستارى ارنايى قۇرىلعان 2018 -جىلعا ارنالعان ءبىرىڭعاي رەسپۋبليكالىق مەدياجوسپار اقپاراتتىق ستراتەگياسى بويىنشا جۇزەگە اسىرىلادى. ءبىز بارلىق شارالاردىڭ PR- الەۋەتىن ساراپتاپ، شەشۋشى مەسەندجدەر مەن نەگىزگى ماقساتتى توپتاردى، كوممۋنيكاتسيانىڭ ءتيىمدى كانالدارىن تاڭداپ الدىق. جىلدىڭ سوڭىنا دەيىن 10 ميلليون ادامدى قامتيتىن 1,5 مىڭعا جۋىق اقپاراتتىق ءونىمدى شىعارۋ كوزدەلۋدە»، - دەدى داۋرەن ابايەۆ.
مينيستر ءوز سوزىندە سيفرلاندىرۋ مەن «زەردە» حولدينگى بازاسىندا جوبالىق كەڭسە سالاسىندا مەملەكەتتىك ورگانداردىڭ ءوزارا اقپاراتتىق قارىم- قاتىناسىنىڭ الگوريتمى ازىرلەنەتىنىن تىلگە تيەك ەتتى.
«جۇمىسىمىز ءتيىمدى بولۋ ءۇشىن مەملەكەتتىك ورگاندارعا جوبالىق كەڭسە بويىنشا جاۋاپتى ادامدى بەلگىلەۋدى سۇرايمىز. بۇدان كەيىن ءبىز اپتا سايىن ورتالىق كوممۋنيكاتسيالار قىزمەتىندە «سيفرلىق قازاقستان» اياسىندا جوسپارلانعان شارالاردان حابار بەرىپ وتىرامىز»، - دەيدى ول.
ءمينيستردىڭ ايتۋىنشا، ۆيرتۋالدى ءونىم بويىنشا قاجەتتى كونتەنت پەن ۇسىنىستاردى ۋاقتىلى ازىرلەۋ ءۇشىن و ق ك- دا كەستە جاساۋ قاجەت بولۋى مۇمكىن.
«باقىتجان ءابدىر ۇلى، ءبىز ءارتۇرلى كەيستەردى تالدادىق. بارلىق مەمورگاندارعا ساپالى كونتەنت ازىرلەۋ قاجەت. ول كونتەنتتەر مەملەكەت باسشىسىنىڭ ايتقان مىندەتتەرىن انىق كورسەتىپ تۇرار ەدى. ماسەلەن، بۇل قادام اۋەجايدا ۇشۋ الدىندا ايىپپۇلداردىڭ تولەنگەنىن كورسەتەر ەدى. تالداۋ جاسالدى. ماسەلەن، ءبىر ادام مەديتسينالىق وپەراتسياعا اسىعىپ تۇرعانىمەن، بولماشى ايىپپۇلعا بولا ۇشا الماي تۇر دەلىك. ونداي ادامعا كۇن تۇگىلى ساعاتتاردىڭ قۇنى قىمبات. وپەراتسيا جەدەل جاسالۋى كەرەك. ياعني، ادام اۋەجايدا ايىپپۇلىن تولەپ، وپەراتسياسىنا بارا بەرەدى. بۇل دەنساۋلىق ساقتاۋ كۆوتاسى بويىنشا جاسالدى. بۇل سيفرلاندىرۋدىڭ ارتىقشىلىققا يە ۇلگىلەرىنىڭ ءبىرى»، - دەپ ءتۇيدى داۋرەن ابايەۆ.
