تۇركىستاندا اياعىن شالىس باسقاندارعا كومەك كورسەتىلەدى

شىمكەنت. قازاقپارات - تۇركىستاندا «پروباتسيا ءۇيى» اشىلدى. ەندى اياعىن شالىس باسىپ، تەمىر توردا جازاسىن وتەپ شىققاندار وسى جەردەن قۇقىقتىق كومەك الا الاتىن بولادى، دەپ حابارلايدى قازاقپارات ءتىلشىسى.

داعدارىستىق ورتالىق ەلباسىنىڭ «100 ناقتى قادام - ۇلت جوسپارى» تاپسىرماسى اياسىندا بوي كوتەرىپ وتىر. يگى باستاماعا جەرگىلىكتى بيلىك پەن وبلىستىق قىلمىستىق اتقارۋ جۇيەسى دەپارتامەنتى ۇيىقتى بولىپ وتىر.

ورتالىقتا سوتتالعاندارعا «ءبىر تەرەزە» قاعيداسى بويىنشا قىزمەت كورسەتىلمەك. جوبا اياسىندا جازاسىن وتەپ شىققاندار قوعامعا قايتا بەيىمدەلىپ، الەۋمەتتىك تۇرعىدان قولداۋ كورمەك. سونداي-اق قۇجاتتارىن راسىمدەپ، جۇمىسقا ورنالاسادى. پروباتسيا ۇيىندە 10 مەكەمەنىڭ قىزمەتكەرلەرى مەن زاڭگەر قۇقىقتىق كەڭەس بەرەتىن بولادى. ودان بولەك، ناركولوگ، پسيحولوگ سياقتى ماماندار مەن اۋداندىق ەمحانا، اۋرۋحانا دارىگەرلەرى مەديتسينالىق تەكسەرۋدەن وتكىزەدى.

اۋداندىق دەنە شىنىقتىرۋ جانە سپورت ءبولىمى مەن جۇمىسپەن قامتۋ جانە الەۋمەتتىك باعدارلامالار بولىمدەرىنىڭ ماماندارى دا ايىنا 2 رەتتەن كەلىپ، جۇمىس جۇرگىزبەك.

ايتا كەتەيىك، وڭتۇستىك وڭىرىندە مۇنداي مەكەمە شىمكەنت پەن كەنتاۋ قالالارىندا، وتىرار مەن شاردارا اۋداندارىنان اشىلعان.