قازاقتىڭ «مەسسيى» رەسەيلىك كلۋبپەن كەلىسىمشارتقا قول قويدى

 استانا. قازاقپارات - «قازاقتىڭ مەسسيى» دەپ تانىلعان جاس ويىنشى ەركەبۇلان سەيداحمەت رەسەي پرەمەر- ليگاسىنداعى «ۋفا» كومانداسىمەن كەلىسىمشارتقا قول قويدى. بۇل تۋرالى كوماندانىڭ رەسمي سايتى حابارلادى.

 فۋتبولشى مەن كلۋب ۇزاق مەرزىمدى كەلىسىمشارتقا كەلىسكەن. ول جاڭا كومانداسىندا 10 نومىرمەن الاڭعا شىعاتىن بولادى. ەستەرىڭىزدە بولسا ەركەبۇلان سەيداحمەت قاڭتار ايىنىڭ ورتاسىندا "ۋفامەن" وقۋ- جاتتىعۋ جيىنىنا اتتانعان بولاتىن. كوماندانىڭ كيپردەگى ەكى بىردەي دايىندىق شارالارىنا قاتىستى. لارناكانىڭ (كيپر) "الكي" كومانداسىنا قارسى جولداستىق كەزدەسۋدە الاڭعا شىعىپ، العاشقى گولىن دا سوقتى. پلوتسكىنىڭ (پولشا) "ۆيسلا" كلۋبىنا قارسى ويىندا ءبىر تايم ويناسا، "سلوۆان" (چەحيا) كومانداسىنا قارسى كەزدەسۋدە 90 مينۋت ويناپ، ەكى ناتيجەلى پاس بەردى. سوڭعى ويىنىن لاتۆيالىق "ليەپايا" كلۋبىنا قارسى وتكىزدى. ەركەبۇلان سەيداحمەت 2017 -جىلى قازاقستان پرەمەر- ليگاسىندا "تاراز" كلۋبىندا وينادى. ون بەس ويىنعا قاتىستى. ءبىر گول سوعىپ، ءبىر ناتيجەلى پاس بەردى.

Massaget.kz