رەسەيدە اپاتقا ۇشىراعان ۇشاقتىڭ «قارا جاشىگى» تابىلدى

استانا. قازاقپارات - ىزدەۋ جۇمىستارى بارىسىندا رەسەيلىك قۇتقارۋشىلار ماسكەۋ ماڭىندا اپاتقا ۇشىراعان ان-148 ۇشاعىنىڭ «قارا جاشىگىن» تاپتى.

بۇل تۋرالى ماسكەۋ وبلىستىق ت ج م باسقارماسىنىڭ باسشىسى سەرگەي پولەتىكين حابارلادى، دەپ حابارلايدى تاسس اگەنتتىگى.

«ىزدەۋ جۇمىستارى ءجۇرىپ جاتقان 18 سەكتوردان قارا جاشىك تابىلدى. قازىر ماماندار اقپاراتتار ساقتالعان جابدىقتى انىقتاپ، يدەنتيفيكاتسيالىق جۇمىستار جۇرگىزۋدە»، - دەدى ول.

س. پولەتىكيننىڭ ايتۋىنشا، ۇشاق قيراندىلارىنىڭ شاشىراۋ شەكاراسىن ناقتىلاۋ جانە زەرتتەۋ ءۇشىن توعىز ارنايى ۇشاتىن اپپارات قولدانىلۋدا.

«ىزدەۋ جۇمىستارى ءجۇرىپ جاتقان جەر 29 سەكتورعا بولىنگەن، ونىڭ ءارقايسىسىنا ءبىر-ءبىر اعا قىزمەتكەر تاعايىندالعان. ۇشاق قيراندىلارىن جينايتىن ارنايى الاڭ دايىندالدى. قازىر نەگىزگى كۇش مايىتتەر مەن ۇشاق قالدىقتارىن جيناپ الۋعا باعىتتالعان»، - دەدى ول.