مۇرات ابەنوۆ: پارا بەرگەندەردى كوبىرەك جاريا ەتۋ قاجەت

استانا. قازاقپارات - پارا بەرەتىن ادامداردى كوبىرەك اشكەرە ەتۋ كەرەك. بۇگىن «اتامەكەن» ۇلتتىق كاسىپكەرلەر پالاتاسى پرەزيديۋمى جانىنداعى «اقپاراتتىق- كوممۋنيكاتسيالىق تەحنولوگيالار جانە جاسىل ەكونوميكا» كوميتەتىنىڭ مۇشەسى مۇرات ابەنوۆ وسىلاي ءمالىم ەتتى، حابارلايدى قازاقپارات.

«جولداعى جەمقورلىق بويىنشا كوبىنە پوليتسيا قىزمەتكەرلەرىن سىنايمىز. ال قوعام نە قاراپ وتىر؟ ازاماتتار نەگە پارا بەرەدى؟ پارا العان پوليتسيانى ۇستايمىز دا، ال نەگە پارا بەرگەن ادامداردى ۇستاپ، جاريا ەتپەيمىز؟»، - دەدى م. ابەنوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ سوزىنە قاراعاندا، بۇل باعىتتا 2017 -جىل وتە بەلسەندى جىل بولدى، وسى ورايدا ازاماتتار وتە جوعارى بەلسەندىلىك تانىتقان.

«مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى 2017 -جىلدىڭ باسىنان باستاپ ءبىزدى شاقىرىپ (ارنايى مونيتورينگ توبىنا)، جەمقورلىققا قارسى ءىس-قيمىلدارعا قاتىستى ۇسىنىستارىمىزدى نازارعا الدى. مەملەكەت ءبىر ءوزى قانشا سىبايلاس جەمقورلىقپەن كۇرەسكەنىمەن دە جەتىستىككە جەتە المايدى، ياعني قارجى دا، وسىمەن اينالىساتىن قىزمەتكەرلەر دە جەتىسپەيدى. تەك بىرىكسەك قانا بۇل باعىتتاعى پروبلەمالاردى شەشۋ مۇمكىن بولادى. مەملەكەت ءوز تاراپىنان اشىق ءارى جاريا تۇردە جۇمىس ىستەۋى كەرەك، ال قوعام سونى قولداۋى ءتيىس. بۇل تۇرعىدا جەمقورلىق ارەكەتىنە بارعانداردى سىناۋ قاجەت. بيزنەس «مەنى قىسىپ جاتىر، تەكسەرىپ جاتىر» دەپ ايقايلاي بەرمەي، ءوزى دە پارا بەرمەۋى شارت. اشىق تۇردە كونكۋرستارعا قاتىسىپ، پاراسىز جۇمىس ىستەۋگە ەكپىن قويعانى دۇرىس. ازاماتتارىمىز وڭاي جولعا تۇسپەي، ماسەلەسىن پارامەن شەشپەي، ءوزى زاڭدى تۇردە ءجۇرۋى كەرەك. بۇل قادامداردىڭ بارلىعى قاتار ىسكە اسىرىلسا، تەك قانا سول كەزدە عانا سىبايلاس جەمقورلىقتى ازايتۋعا بولادى»، - دەدى ابەنوۆ.

ونىڭ ايتۋىنشا، بىرلەسە اتقارىلعان جۇمىستاردىڭ بارىسىندا اۆكولىكتەردى تىركەۋ، مامانداندىرىلعان ح ق ك و- لار شارالارى الدەقايدا جاقساردى.

«ارنايى جوسپارلار قۇرىلدى. بۇل باعىتتا ورتاق پرولەمالاردى بىرگە شەشتىك. مەملەكەتتىك ورگانداردىڭ ءبىر- بىرىمەن بايلانىسى ءتيىستى دەڭگەيدە ەمەستىگى بايقالدى. ءقازىر بۇل بايلانىستار كۇشەيتىلىپ، اقپاراتتىق بازالار ءوزارا قوسىلدى. زاڭداردى دا وزگەرتۋگە قاتىستى ۇسىنىس بەرىلدى. بارلىعىن جۇيەلى تۇردە شەشپەسە بولمايدى، تەك قانا مەملەكەتتىك قىزمەتكەرلەردى ايىپتاي بەرگەن دە دۇرىس ەمەس»، - دەدى ول.

ايتا كەتەيىك، باسپا ءسوز ءماسليحاتىنا سىبايلاس جەمقورلىققا قارسى ستراتەگيانى جۇزەگە اسىرۋدىڭ سىرتقى ساراپتاماسى مەن باعالاۋ جونىندەگى ارنايى مونيتورينگ توبى مۇشەلەرى قاتىسىپ، ولار وزدەرىنىڭ العاشقى ناتيجەلەرىمەن ءبولىستى.