پحەنچحان: قازاقستاندىق سپورتشىلاردىڭ ءۇشىنشى جارىس كۇنگى ناتيجەلەرى
جەكسەنبى كۇنى ەل قورجىنىنا كوپتەن كۇتكەن العاشقى مەدال ءتۇستى. فريستايلشى يۋليا گالىشەۆا فينالدىق كەزەڭدەردە بار تاجىريبەسىن سالدى. يۋليا اقتىق كەزەڭدەگى العاشقى ەكى مۇمكىندىگىندە قاجەتتى ۇپايلارعا قول جەتكىزىپ، فينالعا الەمدەگى ەڭ مىقتى جەتى قىزدىڭ ءبىرى بولىپ شىقتى.
ول شەشۋشى سىندا ەڭ ءبىرىنشى بولىپ سايىسقا شىعىپ، 77.40 ۇپايعا يە بولدى. كەيىن قارسىلاستارىنىڭ ناتيجەلەرىن كۇتىپ وتىردى. الايدا، وزگەلەردىڭ ۇپايى گالىشەۆادان اسىپ ءتۇسىپ جاتتى. بار ماسەلە سوڭعى سپورتشىنىڭ ناتيجەسىنە بايلانىستى ەدى. قازاقستاندىقتاردىڭ باعىنا، ال ءوزىنىڭ وكىنىشىنە قاراي، ول سپورتشى باعىتىنان جاڭىلىپ، اياعىنداعى شاڭعىسى ونى باسقا جولعا بۇرىپ جىبەردى. سول- اق ەدى گالىشەۆانىڭ قولا جۇلدەگە ىلىككەنى بەلگىلى بولدى.
سونىمەن، قازاقستان قۇراماسى كوپتەن كۇتكەن العاشقى مەدالعا يە بولدى. قازاقستاندىق تاعى ءبىر فريستايلشىمىز اياۋلىم امىرەنوۆا موگۋل سايىسىنىڭ ەكىنشى ىرىكتەۋ كەزەڭىندە باق سىناپ، فينالدىق كەزەڭگە وتپەي قالدى.
11 -اقپان كۇنى سونداي-اق شاڭعىمەن سكياتلون جارىسىنا شىققان قوس سپورتشىمىزدىڭ ءبىرى ۆيتاليي پۋحكالو مارە سىزىعىن 34- بولىپ كەسىپ وتسە، ەۆگەني ۆەليچكو 43-كەلدى.
ال بياتلوننان 10 شاقىرىمدىق جارىسقا تۇسكەن ەر ازاماتتارىمىزدىڭ بارلىعى دا جۇلدەلى ورىننان تىس قالدى. ولاردىڭ اراسىندا ەڭ ۇزدىك ناتيجە رومان ەرەمينگە تيەسىلى بولدى. ول نىسانا كوزدەۋدە ەكى رەت قاتەلىككە بوي الدىرىپ، جارىس قورىتىندىسىندا 43- ورىنعا تۇراقتادى. ۆلاديسلاۆ ۆيتەنكو بولسا، نىسانا كوزدەۋدە 4 رەت قاتەلىك جىبەردى. ۆاسيلي پودكورىتوۆ (نىسانا كوزدەۋدە ءبىر رەت قاتەلىك جاسادى) پەن ماكسيم براۋن (نىسانا كوزدەۋدە 4 رەت قاتەلىك جاسادى) ۇزدىك 70 سپورتشىنىڭ قاتارىنا دا ىلىگە المادى.
شانا سپورتىنان سىنعا تۇسكەن قازاقستاندىق نيكيتا كوپىرەنكو جارىستا 2:29.718 ۇپاي ەنشىلەپ، فينالعا وتپەي قالدى.
بۇگىن سونداي-اق قازاقستاندىق يگور زاكۋردايەۆ تاڭ شاڭعىسىنىڭ شاپشاڭ ءتۇسۋ سايىسىندا (فينال) ونەر كورسەتۋى ءتيىس بولاتىن. الايدا، اۋا رايىنىڭ قولايسىزدىعىنا بايلانىستى جارىستار 15-16 -اقپانعا اۋىستىرىلدى.
ازىرگە قازاقستان قورجىنىندا 1 قولا مەدال بار. 9 -اقپاندا باستالعان وليمپيادا ويىندارى 25 -اقپان كۇنى مارەسىنە جەتەدى.
