وزبەكستان قازاعى كوفەمەن سۋرەت سالۋدىڭ وزىندىك تەحولوگياسىن ويلاپ تاپتى

تاشكەنت. قازاقپارات - وزبەكستانداعى ەتنيكالىق قازاق، سۋرەتشى قاراپايىم ەريتىن كوفەمەن سۋرەت سالۋدىڭ وزىندىك تەحنولوگياسىن ويلاپ تاپتى.

ونىڭ شىعارماشىلىعىمەن «قازاقپارات» ح ا ا مەنشىكتى ءتىلشىسى تانىسىپ قايتتى.

ەرىك قۇلمانوۆ 1989 -جىلى تاشكەنت وبلىسى بوستاندىق اۋدانى پارگوس اۋىلىندا دۇنيەگە كەلگەن. ەرىكتىڭ شىعارماشىلىعىنىڭ دامۋىنا ونىڭ سۋرەتشى اكەسى نەسىپ قۇلمانوۆ ىقپال ەتكەن.

ول ك. بەكزات اتىنداعى ۇلتتىق ونەر جانە ديزاين ينستيتۋتىن ءتامامداعان سوڭ، سۋرەتشىلىك ونەرىن دامىتا باستاعان. قازىرگى تاڭدا ونىڭ تاشكەنتتە ستۋدياسى بار.

ەرىك مايلى بوياۋدىڭ ورنىنا كوفە قولدانۋدى جاقىندا باستاعان. ول تاجىريبە رەتىندە كوفەمەن بىرنەشە كارتينا سالىپ كورگەن.

«بۇعان دەيىن وزبەكستاندا ەشكىم كوفەنىڭ كومەگىمەن كارتينا سالىپ كورگەن جوق، مەن مۇنى تاجىريبە رەتىندە باستادىم. كوفەمەن سۋرەت سالعاننان كەيىن ونىڭ حوش ءيىسى شىعىپ تۇرادى. سوندىقتان، ادامداردى قىزىعۋشىلىق تانىتۋدا. ءاربىر شاعىن كارتينانى سالۋعا 20-30 مينۋت جۇمسايمىن. بولاشاقتا ۇلكەن كارتينالار سالۋدى جوسپارلاپ وتىرمىن»، - دەپ اتاپ ءوتتى سۋرەتشى.

جاس سۋرەتشى ءوز كارتينالارىن دوستارى مەن جاقىندارىنا ارناپ سالادى ەكەن. ءالى ارنايى ساتىلىمعا شىعارىلماعان، الايدا ونىڭ ستۋدياسىنا كەلگەن تۋريستەر كوفەمەن سالىنعان سۋرەتتەردى ساتۋىن وتىنەدى. ورتا ەسەپپەن شاعىن كارتينانىڭ باعاسى 40 مىڭ سۋمدى قۇرايدى.

 بۇدان بولەك، ەرىك قۇلمانوۆ ونىڭ تۋىندىلارىن قازاقستانداعى ادامداردىڭ ساتىپ الىپ، كەيىن ونى تۇركىستاندا كادەسىي رەتىندە ساتىپ جاتقاندىعىن اتاپ ءوتتى.