ءجۇز جاڭا ەسىم: ءۇرجارلىق قازاق ەرتەگىلەرىن اعىلشىن تىلىنە اۋداردى
اعايىندى جىگىتتەردىڭ ەسىمى اسىرەسە ونەر، ءبىلىم سالاسىندا جۇرگەندەرگە ەتەنە تانىس. وزگە زامانداستارىنان ەرەكشەلىگى اعايىندى جۇمابەكوۆتەر جاستىقتارىنا قاراماستان، ءبىرى اقىندىعىمەن كوزگە تۇسسە، ەكىنشىسى قازاق تىلىندەگى تۋىندىلاردى وزگە تىلدە سويلەتىپ جۇرتشىلىقتىڭ تاڭدايىن قاقتىرادى. جۇمابەكوۆتەر تەتە وسكەن، ەرجان 1987 -جىلى، قۋانىش 1988 -جىلى تۋ تۋعان.
قۋانىش 4 ءتىلدى ەركىن مەڭگەرگەن اۋدارماشى، دوكتورانت. ونىڭ 2015 -جىلى انكاراداعى «Bizim Büro» باسپاسىنان اعىلشىن تىلىندە «Let's Learn to Speak English» اتتى كىتابى جارىق كوردى. ءۇش بولىمنەن تۇراتىن كىتاپتىڭ سەنساتسيالىق جاڭالىعى - اعىلشىن گرامماتيكاسىن باسقا تىلدەرگە سۇيەنبەي، تىكەلەي قازاق تىلىندە تۇسىندىرەتىن العاشقى وقۋ قۇرالى جانە قازاق ەرتەگىلەرىنىڭ اعىلشىن تىلىندە ۇسىنىلۋى بولدى. سونىمەن قاتار، كىتاپتا بريتاندىق اعىلشىن تىلىنەن بولەك امەريكاندىق اعىلشىن ءتىلىنىڭ سوزدىگى دە بەرىلگەن.
ال ەرجان مەكتەپ قابىرعاسىندا جۇرگەندە ولەڭ جازۋدى باستاعان ەكەن. 2005 -جىلى سەمەيدە وتكەن قالالىق «ناۋرىز ناقىشتارى» اتتى جاس اقىندار ايتىسىندا 3-ورىن، 2006 -جىلى 2- ورىندى يەمدەنگەن. 2015 -جىلى «مەرەكە» باسپاسىنان جارىق كورگەن قازاق پوەزياسىنىڭ 10 تومدىق «جىر مارجانى» اتتى انتولوگياسىنا ولەڭدەرى ەنگەن.
«Qazaqstan» ۇلتتىق تەلەارناسىنىڭ تىكەلەي ەفيرىندە وتكەن «قازاقستان چەمپيوناتى» ، «الامان» ايتىستارىنىڭ جۇلدەگەرى. 2012 -جىلى مادەنيەت جانە اقپارات مينيسترلىگىنىڭ قولداۋىمەن «شەكسىزدىك شۇعىلاسى» اتتى جىر جيناعى جارىق شىققان. 2015 -جىلى قازاقستان جاستار وداعى «سەرپەر» سىيلىعىنا يە بولعان.
وتكەن جىلى مەملەكەت باسشىسىنىڭ «بولاشاققا باعدار: رۋحاني جاڭعىرۋ» ماقالاسى اياسىندا تۇركيا رەسپۋبليكاسىنداعى Medeniyetin Burçlar ۇيىمىنىڭ قولداۋىمەن ىستانبۇل قالاسى Ezgi باسپاسىنان «Sonsuzluk Şûles» اتتى كىتابى تۇرىك تىلىندە باسىلىپ شىقتى. كىتاپ تۇركيا رەسپۋبليكاسى ءبىلىم جانە عىلىم مينيسترلىگىنىڭ قولداۋىمەن ىستانبۇل قالاسىندا جارىق كورگەن.
- بارلىق ادامدار سەكىلدى پرەزيدەنتپەن كەزدەسىپ، «رۋحاني جاڭعىرۋ» باعدارلاماسى اياسىندا «قازاقستانداعى 100 جاڭا ەسىم» جوباسىنىڭ جەڭىمپازى بولعانىمىزعا قۋانىشتىمىز. ەڭبەگىڭنىڭ ەلەنىپ، مەملەكەتتىك دەڭگەيدە وسىنداي قۇرمەتكە بولەنگەنىڭ مەرەيىڭدى وسىرەدى، ارينە. بۇل ءبىزدىڭ شابىتىمىزعا شابىت قوسىپ، ودان سايىن قارىمدى قىزمەت ەتۋىمىزگە، جاڭا يدەيالارىمىزدى ىسكە اسىرۋىمىزعا مۇرىندىق بولارى ءسوزسىز. بىزگە داۋىس بەرىپ، دەمەۋ كورسەتكەن بارلىق جەرلەستەرىمىزگە العىس ايتامىز. بۇل جەڭىسىمىز ءارى قاراي تالماي ەڭبەك ەتۋىمىزگە جەتەلەيدى، - دەيدى اعايىندى ەرجان مەن قۋانىش جۇمابەكوۆتەر.
ايتا كەتەيىك، ەرجان 2004 -جىلى اباي اتىنداعى ورتا مەكتەپ- ليتسەيىن، 2008 -جىلى سەمەي قالاسى، قازاق يننوۆاتسيالىق گۋمانيتارلىق- زاڭ ۋنيۆەرسيتەتى فيلولوگيا فاكۋلتەتى «قازاق ءتىلى مەن ادەبيەتى» ماماندىعىن ۇزدىك ءبىتىرىپ، 2010 -جىلى وسى ءبىلىم ورداسىنىڭ «قازاق ءتىلى مەن ادەبيەتى» ماماندىعى بويىنشا عىلىم ماگيسترى اتانعان. 2016 -جىلدان باستاپ تۇركيا رەسپۋبليكاسىنداعى ومەر حاليسدەمير ۋنيۆەرسيتەتىنىڭ دوكتورانتى.
ال قۋانىش 2006 -جىلى باۋىرجان مومىش ۇلى اتىنداعى ورتا مەكتەپتى بىتىرگەن سوڭ مۇحتار اۋەزوۆ اتىنداعى سەمەي ۋنيۆەرسيتەتىنىڭ گرانتىن جەڭىپ، قازاق ءتىلى مەن ادەبيەتى ماماندىعى بويىنشا ءبىلىم العان. ونىڭ گرانتقا يە بولۋى دا وزگەشە. قۋانىش وبلىستىق «م. اۋەزوۆ جانە الەمدىك مادەنيەت» شىعارماشىلىق سايىسىندا 100 ۇمىتكەر ىشىنەن م. اۋەزوۆتىڭ 20 تومىن جاتقا ايتقانى ءۇشىن جوعارى وقۋ ورنىنا گرانتتى ۇتتى. ۋنيۆەرسيتەتتەن سوڭ ءبىلىمىن شىڭداۋ ماقساتىندا 2010-2011-جىلدار ارالىعىندا مالايزيانىڭ كۋالا- لۋمپۋر قالاسىنداعى UCTİ ۋنيۆەرسيتەتىندە اعىلشىن ءتىلىن تەرەڭدەتە وقىعان.
2012 -جىلى قاينار ۋنيۆەرسيتەتىن شەت ءتىلى: ەكى شەت ءتىلى (اعىلشىن- تۇرىك) ماماندىعى بويىنشا اياقتاپ، شەت تىلدەر جانە ىسكەرلىك كارەرا ۋنيۆەرسيتەتىندە عىلىم ماگيسترى دارەجەسىن العان. 2015 -جىلدان تۇركيا رەسپۋبليكاسى، ومەر حاليسدەمير ۋنيۆەرسيتەتىنىڭ دوكتورانتى.
زۋحرا نۇرجان قىزى
