قايرات نۇرتاس اۋىر دەرتكە شالدىققان قىزدىڭ ارمانىن ورىندادى
«پەدياتريا جانە بالالار حيرۋرگياسى عىلىمي ورتالىعى» باسپا ءسوز قىزمەتىنىڭ مالىمەتىنشە، جاقىندا عانا وتادان شىققان ايدانا سۇيىكتى ءانشىسىن ءبىر كورۋدى ارمانداعان ەكەن. كىشكەنتاي جانكۇيەرىمەن تانىسقان ءانشى ايداناعا جانە بارشا ونكوگەماتولوگيا بولىمىندە ەم الۋشى بالالارعا اق تىلەگىن ءبىلدىرىپ، تەز ساۋىعىپ كەتۋلەرىن تىلەدى. قايرات نۇرتاس باسقا بولمەلەردە جاتقان بالالاردىڭ دا قال- جاعدايلارىن سۇراپ، اڭگىمەلەسكەن.
«كىشكەنتاي قىزدىڭ ءبىر اۋىز تىلەگىن ورىنداعان اق جۇرەكتى قايرات نۇرتاسقا جانە كەزدەسۋدى ۇيىمداستىرۋعا مۇرىندىق بولعان «اميلا» قورىنا العىسىمىزدى بىلدىرەمىز. نيەتى مەن تىلەگى قابىل بولسىن! بۇل كەزدەسۋ بالالاردىڭ سىرقاتتان ساۋىعىپ كەتۋلەرىنە سەپتىگىن تيگىزەدى دەگەن ۇمىتتەمىز. اتا- انالارىنا توزىمدىلىك پەن سابىر، سەنىم مەن ءۇمىت تىلەيمىز! دۇنيەدە ەشقانداي ءسابي اۋىرماسىن، اۋرۋ اتاۋلى انانىڭ كوڭىلىنە قاياۋ تۇسىرمەسىن! قايىرىمدى، مەيىرىمدى، كەڭ پەيىلدى بولۋ قازاق حالقىنىڭ قانىندا بار قاسيەت. بۇل دۇنيەدە انانىڭ كوز جاسى مەن بالانىڭ اۋىرعانىن كورۋدەن ارتىق قاسىرەت جوق. مۇنداي تاعدىردى ەشكىم وزىنە تىلەپ المايدى. ءار جۇرەككە مەيىرىمدىلىك، ىزگىلىك، ادامگەرشىلىك ءتارىزدى اسىل قاسيەتتەردى ۇيالاتۋ، قينالعان جاندارعا قولداۋ كورسەتۋ، تاعدىردىڭ جازۋىمەن جارالى بولعاندارعا جاردەم بەرۋ ءاربىر ازاماتتىڭ پارىزى» ، - دەلىنگەن ورتالىق تاراتقان مالىمەتتە.
ا
ۆتور: مارلان جيەمباي
