كەشىرىم سۇراۋ كىشىرەيۋ مە؟

 استانا. قازاقپارات - امەريكالىق الەۋمەتتىك پسيحولوگتار توبى اتا- انالار بالالارىن نە سەبەپتى كەشىرىم سۇراۋعا ۇيرەتەدى دەگەن ساۋالعا جاۋاپ تابۋ ماقساتىندا زەرتتەۋ جۇمىسىن جۇرگىزدى.

 بۇل شاراعا 483 اتا- انا جانە ولاردىڭ 3-10 جاس ارالىعىنداعى بالالارى اتسالىستى. زەرتتەۋ اۆتورلارى كەشىرىم سۇراۋعا تاربيەلەۋ قانشالىقتى ماڭىزدى ەكەنىن ءبىلۋ ماقساتىندا بىرنەشە جاۋاپ نۇسقاسى بار ساۋالناما بەرەدى.

 ناتيجەسى: • اتا- انالاردىڭ%96 ى كەشىرىم سۇراۋ ماڭىزدى جانە ونى بالانىڭ بويىنا ءسىڭىرۋ قاجەت دەگەن شەشىمگە كەلگەن. ولاردىڭ ويىنشا، بۇل قاسيەت بالالاردىڭ بويىنداعى جاۋاپكەرشىلىكتى، ادامعا دەگەن سىيلاستىقتى دامىتادى.

 • ال، %88 اتا- انا بالا ادەيى قاتەلىك جىبەرمەسە دە، كەشىرىم سۇراۋى ءتيىس دەگەن تۇجىرىممەن كەلىسكەن.

ال، اتا- انالاردىڭ %5 ى كەشىرىم سۇراۋ وزگەنىڭ الدىندا كىشىرەيۋ جانە ءوزىنىڭ تومەندىگىن مويىنداۋ دەگەن نۇسقانى بەلگىلەگەن.

 اۆستريالىق لينگۆيست ر. راتماير «كەشىرىم - قوعامدىق نورمالارعا سايكەس ءومىر سۇرەتىن ادامنىڭ ءارى سىپايىلىقتىڭ باستى بەلگىسى» ، - دەگەن. مىسالى، كوشەدەگى كەز كەلگەن ادامنىڭ نازارىن وزىمىزگە اۋدارۋ ءۇشىن اڭگىمەنى «كەشىرىڭىز» دەپ باستايتىنىمىز انىق. بۇل - بەيتاراپ سىپايىلىق نەمەسە بايلانىس ورناتۋدىڭ باستى كومەكشىسى. سونىمەن قاتار، پسيحولوگيادا كەشىرىم سۇراۋ ارقىلى ادام ءوزىن جەڭىل سەزىنەدى دەگەن تۇجىرىم بار.

 دەگەنمەن، پسيحولوگ تايلەر دجي وكيموتو بۇل پىكىردى جوققا شىعاردى: ادام كەشىرىم سۇراماعان جاعدايدا ءوزىن الدەقايدا جاقسى سەزىنەدى. مۇنداي «تەنتەكتىك» ادامعا راحاتتانۋ سەزىمىن سىيلاپ، ونىڭ وزىنە دەگەن سەنىمىن ارتتىرادى. ياعني، ادام ءوز ءومىرىن باسقارۋدى قولعا الادى: وزگە ادام نەمەسە ادەپ نورماسى ءىس- ارەكەتىڭنىڭ باعىتىن انىقتاۋعا قاۋقارسىز بولادى. قاراپايىم تىلمەن ايتقاندا، كەشىرىم سۇراعان جاعدايدا، ءسىزدى كەشىرۋ نە جازالاۋ (ءسىزدى باسقارۋ) تۋرالى شەشىم قابىلداۋ وزگە ادامنىڭ يەلىگىنە وتەدى. ءسىز سول شەشىمدى كۇتەسىز جانە سانا ەركىندىگىن جوعالتاسىز. ءبىراق، كەشىرىم سۇراۋ ارقىلى ءسىز ادامي قالپىڭىزدى ساقتاپ قانا قويماي، ادامدار اراسىنداعى ءوزارا قارىم- قاتىناستى نىعايتاسىز. ءسىز ءبىر رەت كىشىرەيىپ، الداعى ۋاقىتتا تۋۋى مۇمكىن ماسەلەلەردىڭ الدىن الاسىز.

Massaget.kz