جەلبىرەگەن كوك تۋ مەن جەڭىسكە قادام - قازاقستان سپورتشىلارى وليمپيادا شەرۋىندە ءجۇرىپ ءوتتى
ارنايى سالىنعان بەس بۇرىشتى ستاديونداعى شەرۋدە الەمنىڭ 92 ەلىنىڭ سپورتشىلارى كەزەك بويىنشا ءجۇرىپ كەلەدى. ايتا كەتەرلىگى، بەس قۇرلىقتاعى حالىقتىڭ وكىلدەرى ءۇشىن سالىنعان ستاديونعا 35 مىڭ ادام سيادى ەكەن. قىسقى وليمپيادانىڭ اشىلۋ سالتاناتىندا ۇيىمداستىرۋشىلار تابيعات پەن ادامزاتتىڭ ۇيلەسىمىن كوركەم كورىنىس ارقىلى كورسەتە ءبىلدى.
سپورتشىلاردىڭ شەرۋىن گرەكيا قۇراماسى باستادى. گرەكيا ەكى سپورت تۇرىنەن ءتورت قانا سپورتشى اكەلگەن. ولاردىڭ ىزىمەن قار جاۋماسا دا قىسقى وليمپياداعا كەلىپ وتىرعان قار جاۋمايتىن گانا ەلىنىڭ ءبىر عانا سپورتشىسى شەرۋدى جالعاستىردى. ودان كەيىن نيگەريا، نيدەرلاندى جانە تاعى باسقا ەلدەردىڭ سپورت ساڭلاقتارى شەرۋدە ءجۇرىپ ءوتتى.
كوپ كەشىكپەي قازاقستاننىڭ نامىسىن قورعايتىن سپورتشىلار شەرۋدەن كورىندى. حالىقارالىق دارەجەدەگى سپورت شەبەرى، شورت- ترەكشى ابزال اجىعاليەۆ قازاقستاننىڭ كوك تۋىن كوككە جەلبىرەتتى. قازاقستاندىق دەلەگاتسيانىڭ ايبىنى اسقاق، رۋحى باسىم. ستاديوندا سونىمەن بىرگە، كورەرمەننىڭ قوشەمەتىنە يە بولعان 46 سپورتشىمىز ءۇشىن تاقىم قىسىپ وتىرعان قازاقستاندىق جانكۇيەرلەر دە كورىندى.
ايتا كەتسەك، وسىدان از عانا ۋاقىت بۇرىن وڭتۇستىك كورەيانىڭ پحەنچحان قالاسىندا ХХIII قىسقى وليمپيادا ويىندارى رەسمي تۇردە اشىلعان بولاتىن. جالپى وليمپياداعا قازاقستان سپورتشىلارى 57 جولداما جەڭىپ العان ەدى. ولار سپورتتىڭ 9 تۇرىنەن سىنعا تۇسەدى. وليمپيادادا جالپى 15 سپورت تۇرىنەن 102 مەدال جيىنتىعى ساراپقا سالىنادى. اتاپ ايتقاندا، بياتلوننان - 11، بوبسلەيدەن - 3، سكەلەتوننان - 2، كيرلينگتەن - 3، كونكيمەن جۇگىرۋدەن - 14، مانەرلەپ سىرعاناۋ - 5، شورت- ترەك - 8، تاۋ شاڭعىسى - 11، شاڭعى قوسسايىسىنان - 3، شاڭعى جارىسى - 12، شاڭعىمەن ترامپليننەن سەكىرۋدەن - 4، فريستايل - 10، سنوۋبورد - 10، شانا سپورتى - 4، شايبالى حوككەيدەن - 2 مەدال ويناتىلادى.
ايتا كەتەرلىگى، قىسقى وليمپيادا ويىندارى 1924 - جىلدان بەرى وتكىزىلىپ كەلەدى. ХХIII قىسقى وليمپيادا ويىندارىنا بۇل جولى 92 مەملەكەتتىڭ سپورتشىلارى قاتىسادى. بۇل قىسقى وليمپيادا تاريحىنداعى قاتىسۋشى ەلدەر بويىنشا رەكورد بولىپ وتىر.
اۆتور: ايان بەكەن ۇلى
