ەلباسى: سىبايلاس جەمقورلىققا قارسى تاباندى كۇرەستى جالعاستىرۋ كەرەك

  استانا. قازاقپارات - قازاقستان پرەزيدەنتى نۇرسۇلتان نازاربايەۆ ەلىمىزدەگى قىلمىستىق پروتسەستەردىڭ ارتىق جازالايتىن تۇستارىن تومەندەتۋدى تاپسىردى، دەپ حابارلايدى «قازاقپارات» ح ا ا ءتىلشىسى.

ۇكىمەتتىڭ كەڭەيتىلگەن وتىرىسىنا قاتىسقان مەملەكەت باسشىسى زاڭنىڭ ۇستەمدىگى مەن سىبايلاس جەمقورلىققا قارسى كۇرەس كۇن تارتىبىنەن تۇسپەيتىنىن اتاپ ءوتتى. بۇل باعىتتا نۇرسۇلتان نازاربايەۆ ايتىپ وتكەندەي، از جۇمىس جۇرگىزىلمەگەن.

 «قۇقىق قورعاۋ قۇرىلىمدارىنىڭ جۇمىسى ءۇشىن بارلىق جاعداي جاسالدى، ايلىقتارى كوتەرىلدى. الايدا قۇقىق قورعاۋ ورگاندارىنا دەگەن قوعامنىڭ سەنىمى ءالى دە تومەندەۋ دەيتىندەي سەبەپتەر بار. وسىعان بايلانىستى قىلمىستىق پروتسەستەردىڭ ارتىق جازالايتىن تۇستارىن تومەندەتۋ مەن ونى گۋمانيزمگە قاراي باعىتتاۋ باعدارىن جالعاستىرا بەرۋ كەرەك. سىزدەر وزدەرىڭىز باتىستا قىلمىستىق ىستەردىڭ 80-90 پايىزى بەيبىت جولمەن شەشىلەتىنىن ايتاسىزدار. بىزگە نەگە ولاي ەتپەسكە؟ بىزدە ايتەۋىر مىندەتتى تۇردە ۇستاپ الىپ، قاماۋ كەرەك. ال ماسەلەنى باسقا دا جولمەن شەشۋگە بولاتىن ەدى عوي» ، - دەدى نۇرسۇلتان نازاربايەۆ.

پرەزيدەنت ءوز سوزىندە قۇقىق قورعاۋ مەن سوت ورگاندارىنىڭ كادرلىق قۇرامىنا قاتاڭ تالاپتار قويىلىپ كەلگەنىن اتاپ ءوتتى. الداعى ۋاقىتتا تالاپ قويۋ جالعاسا بەرمەك.

«ولاردىڭ جۇمىسى سونداي. ولاردىڭ ابىرويى، مورالدىق- ادەپتىلىك كەلبەتى ءمىنسىز بولۋى كەرەك. سىبايلاس جەمقورلىققا قارسى تاباندى كۇرەستى جالعاستىرۋعا ءتيىسپىز» ، - دەدى مەملەكەت باسشىسى.