نۇرسۇلتان نازاربايەۆ حالىقتى سيفرلاندىرۋعا جاپپاي وقىتۋدى تاپسىردى

استانا. قازاقپارات - مەملەكەت باسشىسى نۇرسۇلتان نازاربايەۆ سيفرلاندىرۋ ماسەلەلەرىن حالىققا كەڭىنەن ءتۇسىندىرۋدى جۇكتەدى، دەپ حابارلايدى قازاقپارات ءتىلشىسى.

«داۋرەن اسكەربەك ۇلى (اقپارات جانە كوممۋنيكاتسيالار ءمينيسترى - اۆت. )، تەلەديداردا، ورتالىق جانە وبلىستىق گازەتتەردە سيفرلاندىرۋ بويىنشا ارنايى ايدارلاردى اشۋ قاجەت. سيفرلاندىرۋدىڭ ناتيجەسى قانداي؟ نە ىستەدىك؟ قانداي جوبانى ىسكە اسىردىق؟ جالپى، سيفرلاندىرۋ دەگەنىمىز نە؟ بىلايشا ايتقاندا، بىزگە جاپپاي وقىتۋ شارالارىن قولعا الۋ قاجەت پە؟»، - دەدى ن. نازاربايەۆ ۇكىمەتتىڭ كەڭەيتىلگەن وتىرىسىندا.

پرەزيدەنتتىڭ ايتۋىنشا، سيفرلاندىرۋ ماسەلەسىن مەكتەپ قابىرعاسىنان باستاپ كەڭىنەن ءتۇسىندىرۋ كەرەك. سەبەبى قازىرگى جاستار بولاشاقتا وسى جۇمىسپەن تىعىز اينالىسادى.

«بولاشاقتا ولاردىڭ بارلىعى وسى سالادا جۇمىس ىستەيدى. 2030 -جىلدا مۇلدەم باسقا ەكونوميكا بولادى. سوعان دايىن بولۋىمىز قاجەت. قازىر ءبىلىم سالاسىن ىلعي سىنايدى. رەفورمالار كوپ دەيدى. ءبىراق باسقا امالىمىز جوق. بالالار وزدىگىمەن ويلاپ، شەشىم قابىلداۋعا ۇيرەنۋى كەرەك. ءبارىن جاتتاپ الىپ، ەمتيحان تاپسىرا سالۋ - ول كەشەگى زاماننىڭ تالابى. سوندىقتان قازىرگى سيفرلاندىرۋدى كەڭىنەن ءتۇسىندىرۋىمىز ءارى ۇيرەتۋىمىز كەرەك»، - دەپ اتاپ كورسەتتى مەملەكەت باسشىسى.