استانادا قىز- كەلىنشەكتەرگە ەركەكتىڭ كوڭىلىن اۋلاۋدى ۇيرەتەتىن تاعى ءبىر مەكتەپ اشىلدى

استانا. قازاقپارات - استانادا قىز-كەلىنشەكتەرگە ەرلەردى ەلىتىپ، ءتاتتى قىلىق شىعارۋ شەبەرلىگىن شىڭدايتىن تاعى ءبىر مەكتەپ اشىلدى.

مۇندا ءتىپتى جاسى الپىستى القىمداعان ايەلدەر دە سەزىمنىڭ سيقىرىن ۇيرەنۋگە كەلەدى ەكەن. قازاق قىزدارىنىڭ ەركەككە قۇرىق سالۋى مەن قىلىق شىعارۋىن شىڭدايتىن شەبەرلىك ساعاتتارى كىمگە كەرەك؟ كارى قۇرلىقتان كەلگەن ءۇردىس كارى قىزداردىڭ سانىن ازايتا ما؟

بۇل تۋرالى ەۋرازيا ءبىرىنشى ارناسى حابارلايدى.

ەر ازاماتتىڭ كوڭىلىن اۋلاۋ، ءوزىنىڭ سەكسۋالدىق پوتەنسالىڭدى اشۋ! قىز-كەلىنشەكتەردى ءدال وسىنداي قاسيەتتەرگە ۇيرەتەتىن مەكتەپتەر جاڭبىردان كەيىنگى ساڭىراۋقۇلاقتاي كوبەيىپ كەلەدى.

ماسەلەن، استانانىڭ وزىندە ەر ازاماتتى اينالدىرۋ، ءتاتتى قىلىقتارىمەن ەلىكتىرۋ سەكىلدى شەبەرلىك ساعاتتارىنا سۇرانىس جىل ساناپ ارتۋدا. ونى ورتالىقتىڭ ماماندارى دا راستاپ وتىر. ايتۋىنشا، وعان تەك 30-دان اسقان نازىك جاندار عانا ەمەس، نەمەرە باعىپ وتىرعان اق جاۋلىقتى اجەلەر دە قىزىعۋشىلىق تانىتۋدا.

«بىزگە كوبىنە 30-دان اسقان قىز- كەلىنشەكتەر كەلەدى. ءتىپتى 50-57 جاستاعى جاندار بار. ماسەلەن، ءبىزدىڭ گەيشا ورتالىعىنا 62 دەگى ايەل كەلىپ ءجۇردى. ول ءوزىنىڭ ءومىرىن وزگەرتكىسى كەلدى. مۇنداي جانداردى كورگەندە قۋانامىن. بيىل جاس قىزدار دا قاتىسۋدا. ولار وتباسىن قۇرماي جاتىپ، ەركەكتەردى اينالدىرۋدىڭ بارلىق جولدارىن ۇيرەنەدى. وسىلايشا، قىزدار قاتەلىكتەرگە بوي بەرمەي، ءوزىنىڭ باقىتتى عۇمىر كەشۋىنە ۇلەسىن قوسادى» - دەيدى گەيشا مەكتەبىنىڭ جەتەكشىسى ايجان ءالىقۇلوۆا.

گايانا ءدال وسىنداي شەبەرلىك ساعاتتارىنىڭ بىرەۋىن دە جىبەرمەۋگە تىرىسادى. سەبەبى، ءدال وسى ترەنينگتەر ونىڭ ءومىرىن 180 گرادۋسقا وزگەرتىپتى.

ايتۋىنشا، ەر ازاماتتاردى وزىنە ەلىكتىرۋدى ۇيرەنۋدىڭ ەشقانداي دا ۇياتى جوق. كەرىسىنشە، ءوز-وزىڭە سەنىمدى بولىپ، ەكى جاس اراسىنداعى ماحاببات پەن سەزىم بەرىك ءارى ماڭگى بولادى.

ال، ايجان ءالىمقۇلوۆانىڭ ويىنشا، قازاق قىزدارى ەركەكپەن تىلدەسىپ، ىشكى جان دۇنيەسىن باۋراپ الۋدىڭ جولدارىن جەتىك بىلمەيدى. سول سەبەپتى، تۇرمىسقا شىققان سوڭ ءتۇرلى قيىندىقتارعا تاپ بولادى. ال ورتالىق ماماندارى ەر كىسىلەردىڭ كوڭىلىن باۋراۋدى عانا ەمەس، ونى سىندىرۋدىڭ ءتۇرلى ايلا-تاسىلدەرىن مەڭگەرتەدى.

«قازىر مەكتەپتەر كوپ. ال ءبىزدىڭ گەيشا ورتالىعىنىڭ نەگىزىگى ماقساتى، جىگىتتەردى اينالدىرۋدىڭ ءتۇرلى ادىستەرىن ۇيرەتۋ. الايدا، ونىڭ ءوزىن دۇرىس قولدانۋ قاجەت. ايتپەسە، ەر ازامات ول قىلىقتارىڭىزدى تۇسىنبەي، سىزدەن قاشىپ كەتۋى مۇمكىن» دەيدى گەيشا مەكتەبىنىڭ جەتەكشىسى ايجان ءالىقۇلوۆا.

ال روزا شايماردان قىزى جولداسىمەن وتاسقانىنا 50 جىلدان اسقان. باقىتتى اجە، ومىرلىك جارىن ەشقانداي ايلا-تاسىلدەرسىز-اق باۋراپ العانىن ايتادى. اقىل، پاراساتتىلىق پەن نازىكتىك - قازاق قىزىنىڭ باستى قارۋى. سوندىقتان، مۇنداي ءتالىم تاربيەسى بار قاراكوزدەرگە شەتەلگە ەلىكتەۋدىڭ دە تۇك قاجەتى جوق. ال، ورتالىقتاردىڭ كوزدەگەنى تەك اقشا. ولار ءوز ءوزىن جوعالتىپ العان ايەلدەردىڭ قالتاسىن قاعىپ قانا قويماي، ساناسىن ۋلاۋدا. ال ونىڭ سوڭى جاقسىلىققا الىپ كەلمەيدى، دەيدى.

«ول دا شەتەلدەن كەلگەن، ەۆروپادان كەلگەن. اقشا تابۋدىڭ كوزى بولعاندا، ءتىپتى كوزى. ول جەردە قانداي تاربيە؟ اش جالاڭاش! قالاي بولسا سولاي، ءوز بەتىمەن ۇستايدى ءوزىن. ەركەكتى ايلاكەرلىك جاساپ، الداپ، ارباپ. ول دۇرىس دۇنيە ەمەس!!!» - دەيدى قالا تۇرعىنى روزا شايماردان قىزى.

دەگەنمەن، پسيحولوگ مامانداردىڭ بۇعان دەگەن پىكىرى بولەك. سەبەبى، ورتالىقتار قىز- كەلىنشەكتەردىڭ ءومىرىن وزگەرتىپ قانا قويماي، وزىنە سەنىمدى بولىپ، سۇيىكتى جارىمەن باياندى عۇمىر كەشۋىنە سەپتىگىن تيگىزەدى دەيدى.