نۇرسۇلتان نازاربايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى باستالدى

استانا. قازاقپارات - بۇگىن قازاقستان پرەزيدەنتى نۇرسۇلتان نازاربايەۆتىڭ توراعالىمەن ەل ۇكىمەتىنىڭ كەڭەيتىلگەن وتىرىسى باستالدى، دەپ حابارلايدى قازاقپارات.

وتىرىس بارىسىندا ەلىمىزدىڭ 2017 -جىلعى الەۋمەتتىك- ەكونوميكالىق دامۋ قورىتىندىلارى شىعارىلىپ، الداعى ۋاقىتتا ەكونوميكالىق ءوسىمدى قامتاماسىز ەتۋ جونىندەگى شارالار ايقىندالادى دەپ كۇتىلۋدە.

ايتا كەتەرلىگى، 2017 -جىلى ىشكى جالپى ءونىم ءوسىمى 4 پايىزدى قۇرادى. نەگىزگى كاپيتالعا سالىنعان ينۆەستيتسيا كولەمى 5,5 پايىزعا ارتىپ، ونەركاسىپ ءوندىرىسىنىڭ كولەمى 7,1 پايىزعا ۇلعايدى. 2017 -جىلدىڭ 9 ايىندا شەتەل ينۆەستيتسياسىنىڭ تازا ءتۇسىمى  3034,8 ميلليون دوللاردى قۇرادى.

وتكەن جىلدىڭ قاڭتار- قاراشا ايلارىنىڭ ارالىعىندا قازاقستاننىڭ سىرتقى ساۋدا اينالىمى 69,5 ميلليارد دوللارعا جەتىپ، 2016 -جىلدىڭ سايكەس كەزەڭىمەن سالىستىرعاندا 25,1 پايىزعا ارتتى. ونىڭ ىشىندە ەكسپورت كولەمى 43,1 ميلليارد دوللارعا جەتىپ وتىر. ۇلتتىق بانكتىڭ التىن- ۆاليۋتا اكتيۆى 31,1 ميلليارد دوللار بولدى. 2018 -جىلدىڭ 1 قاڭتارىندا جەكە تۇلعالاردىڭ دەپوزيتتەرى 3,7 پايىزعا كوبەيىپ، 8120,9 ميلليارد تەڭگەنى قۇرادى.

وڭىرلىك شەكتە ونەركاسىپ ءوندىرىسىنىڭ كولەمىنىڭ ارتۋى 14 وڭىردە بايقالدى. ەڭ جوعارى ءوسىم اتىراۋ وبلىسى مەن استانا قالاسىندا تىركەلگەن. ال اۋىل شارۋاشىلىعى جالپى ءونىمىنىڭ ءوسىمى 2,9 پايىزعا جەتتى.

بۇل رەتتە اۋىل شارۋاشىلىعى ونىمدەرى ءوندىرىسىنىڭ ەلىمىزدىڭ 14 وڭىرىندە بايقالعانىن اتاپ وتكەن ورىندى. ەڭ جوعارى ءوسىم - ماڭعىستاۋ، پاۆلودار، جامبىل جانە اقتوبە وبلىستارىندا. قۇرىلىس سالاسىنداعى ءوسىمنىڭ جوعارىلاۋى قوستاناي، اقمولا، قىزىلوردا جانە اقتوبە وبلىستارىندا بايقالادى. جالپى، 2017 -جىلدىڭ قاڭتار- جەلتوقسان ايلارىندا پايدالانۋعا بەرىلگەن ۇيلەردىڭ ءوسىمى 6,2 پايىزعا جەتىپ وتىر.