الماتىدا ەلىمىزدىڭ ۇزدىك قۇسبەگىلەرى باس قوستى - فوتو
رۋحاني جاڭعىرۋ اياسىندا ءوتىپ جاتقان كيەلى جارىستىڭ سالتاناتتى اشىلۋ راسىمىنە الماتى قالاسى دەنە شىنىقتىرۋ جانە سپورت باسقارماسىنىڭ وكىلدەرى، «قىران» فەدەراتسياسىنىڭ وكىلدەرى جانە ۇلتتىق سپورت تۇرلەرىنىڭ جاناشىرلارى قاتىسىپ، قۇتتىقتاۋ سوزدەرىن جەتكىزدى.
«1988 -جىلى الماتىنىڭ ورتالىق ستاديونىندا تۇڭعىش رەت قازاق قۇسبەگىلەرىمەن قاتار، كورشىلەس قىرعىز، تۇرىكمەندەر قاتىسقان حالىقارالىق بۇركىتشىلەر فەستيۆالى ال، 1989، 1990 -جىلدارى ناۋرىز مەيرامى اياسىندا الماتى يپپودرومىندا بۇركىتشىلەردىڭ رەسپۋبليكالىق سايىسى ءوتىپ ەدى. سودان بەرى، وتىز جىلعا جۋىق مەرزىمدە الماتى قالاسىنىڭ اسپانىندا كيەلى قىراننىڭ سامعاۋىن حالقىمىز تاماشالاعان جوق. مىنە، بۇگىن ەلىمىزدىڭ ون ايماعىنان الماتىعا باق سىناسۋعا كەلگەن بۇركىتشىلەرگە العىسىمىزدى بىلدىرەمىز»، - دەپ تىلەك ءبىلدىردى «قىران» فەدەراتسياسىنىڭ اتقارۋشى ديرەكتورى باعدات مۇپتەكە قىزى.
ايتۋلى دودانىڭ باستى ماقساتى وسىناۋ جاقسى ءۇردىستى ەلىمىزدىڭ مادەني، رۋحاني ورداسى - الماتى قالاسىندا قايتا جاڭعىرتىپ، قولعا الۋ ماقساتىندا، بيىلدان باستاپ قىران قۇس باپتاۋشىلاردىڭ جارىسىن وتكىزۋدى داستۇرگە اينالدىرۋ.
رەسپۋبليكالىق تۋرنيرگە اقمولا، اتىراۋ، شىعىس قازاقستان، قاراعاندى، وڭتۇستىك قازاقستان، جامبىل، الماتى وبلىستارى مەن استانا قالاسىنان 60 قا جۋىق قۇسبەگىلەر قاتىسۋدا.
بۇگىن ءبىرىنشى ىرىكتەۋ كەزەڭىندە كورەرمەندەر قۇستى ات ۇستىنەن قولعا شاقىرۋ، شىرعا تارتۋ سياقتى قۇسبەگىلەر مەن بۇركىتتەردىڭ كەرەمەت ونەرىن تاماشالادى. ال جارتىلاي فينالدا ىرىكتەلگەن بۇركىتتەر شەشۋشى كەزەڭدە قويانعا، تۇلكىگە سالىنسا، جارىستىڭ ەكىنشى كەزەڭىندە قارشىعا مەن يتەلگىلەر قولعا شاقىرىلادى، كوگەرشىنگە، قويانعا جىبەرىلەدى.
قاتىسۋشىلاردىڭ جاس ەرەكشەلىكتەرىنە ەشقانداي شەكتەۋ جوق، ءتىپتى، 12 جاستاعى بالادان 70 جاستاعى اقساقالدار دا باپتاعان بۇركىتتەرىمەن سىنعا ءتۇستى. ولاردىڭ ىشىندە ەڭ جاس قۇسبەگىنىڭ بۇركىتى وزىمەن جاستى ەكەن.
«مەنىڭ جاسىم 12-دە، بۇركىتىم دە شامامەن سول جاستا، ەسىمى داۋىل. وسىنداي رەسپۋبليكالىق سايىسقا ءبىرىنشى رەت قاتىسىپ جاتىرمىن. 8-9 جاسىمنان باستاپ قۇسبەگىلىكپەن اينالىسامىن. اكەم بۇركىت باپتاۋدى ۇيرەتكەن، سودان بەرى وسى ىسكە اۋەستەنە باستادىم. جالپى بۇركىتىمدى كۇنارا تازا، تۇزدالماعان ەتپەن اسىرايمىز. وقۋىما بوگەت بولمايدى، ويتكەنى بوس ۋاقىتىمدا اينالىسامىن، نەگىزى اكەم بۇركىتتى اسىرايدى. ۇيگە ولجامەن ورالامىن دەگەن ويدامىن»، - دەدى الماتى وبلىسىنان قاتىسۋشىسى ەرسۇلتان جۇماعۇل.
رەسپۋبليكالىق ءتۋرنيردىڭ ۇزدىكتەرى اقپاننىڭ 10 ى كۇنى انىقتالادى. جارىس جەڭىمپازدارى مەن جۇلدەگەرلەرى الماتى قالاسى دەنە شىنىقتىرۋ جانە سپورت باسقارماسىنىڭ جانە «قىران» فەدەراتسياسىنىڭ اتىنان مەدالدارمەن، ماقتاۋ قاعازدارىمەن ماراپاتتالادى.
