اقىماقتىق - جۇقپالى اۋرۋ

استانا. قازاقپارات - «اقىماقتىق بەينە ءبىر جۇقپالى اۋرۋداي» دەگەن ءسوز شەكسپيردەن قالعان. ول ادام بويىندا ۋاقىتشا ورىن الاتىن قۇبىلىس، سابيلىك شيكىلىككە بالاۋعا دا بولادى.

 دەگەنمەن ودان كوپ زارداپ شەگەتىن ادامدار دا بار، وزىنە عانا ەمەس، اينالاسىنداعى ادامدارعا دا زيانىن تيگىزىپ جۇرەدى. ودان ارىلۋ ءۇشىن نەدەن پايدا بولاتىنىن انىقتايىق. اقىماقتىڭ ءار ءسوزى ءوزى تۋرالى. كەز كەلگەن قارىم قاتىناس ديالوگقا قۇرىلادى، بۇل اقپارات الماسۋدىڭ ءبىر ءتۇرى. اقپاراتتى ءوندىرۋ ەمەس، الماسۋ. كەيدە وتكەن شاقتان ءبىر وقيعا ايتقىڭ كەلەدى. ءبىراق ايتارىڭ ءسوز بولىپ جاتقان جايعا قاتىسى ەش جوق بولسا، ەرىكسىز اقىماقتار قاتارىنا قوسىلاسىز.

 ومىردەن ساباق الۋ ءۇشىن سويلەۋگە قاراعاندا تىڭداۋدىڭ دەسى باسىم ەكەنىن بىلە تۇرا ەسكەرمەيتىن ادام تۋرالى باسقا نە دەۋگە بولادى؟ ! اۋزىمەن وراق وراتىن «اقىلدىلار» كوپ، ءسىز ولاردىڭ قاتارىن تولتىرماڭىز. اقىماققا ءبارى قاۋىپتى. «انا جاققا بارمايمىن، وندا بالەنشە بار» . «ونى دا ىستەمەيمىن، تۇگەن جاعداي بولىپ قالۋى مۇمكىن» . «ساقتانساڭ، ساقتايمىن» دەيدى، ءبىراق ۇنەمى جايلى دا قاۋىپسىز جەر ىزدەۋ بەرۋدەن ءومىر قىزىقسىز بولىپ كەتەدى. ءار ءتىرى پەندە وسۋگە، دامۋعا تالپىنادى. بارلىعىن بايقاپ كورۋ كەرەك، ايتپەسە جەتىلمەيسىز.

 قورقىنىشتارىڭىزبەن وڭاشا وتىرىپ سويلەسىڭىز: ول نەدەن پايدا بولدى، قالاي قۇتىلۋعا بولادى؟ ءوزىڭىز باتىلىڭىز جەتپەسە، بىرەۋدىڭ كومەگىنە جۇگىنىڭىز. ءومىردىڭ تىزگىنىن قورقىنىشقا بەرىپ قويۋ - ناعىز اقىماقتىق. اقىماق ءۇشىن ءومىر تەك اق پەن قارا تۇستەن قۇرالادى. ول قۇبىلىستى، زاتتى، ادامدى تەك جاقسى- جامان، اقىلدى- اقىماق دەپ بولەدى. ءار ادامنىڭ، ءار ءىستىڭ ەشكىم بىلمەيتىن سىرى، ءوز تاريحى بولادى. سوعان ۇڭىلمەي جاتىپ، سىرتىنان تون ءپىشۋ دە اقىماقتىڭ ءبىر بەلگىسى.

 كوپ ىشىندە تەك ءوزى شۋلاپ جۇرەدى. ەلەستەتىڭىز. تىنىش كافە. بىرەۋ نوۋتبۋكپەن جۇمىس ىستەپ وتىر. ەندى بىرەۋلەر رومانتيكالىق كەش جاساپ، سىرلاسىپ وتىر. وسىنداي جانعا جايلى ورىندا ارا- تۇرا جاعىمسىز ساڭقىلداعان كۇلكى مەن داۋرىققان داۋىس شىعادى. بۇل - سول اقىماق. كوپشىلىك ورتادا ءوزىڭدى ۇستاي الماۋ دا اقىماقتىڭ ارەكەتى. ول قارسى الدىنداعى ادامنىڭ جاي- كۇيىن ەلەمەيدى. سويلەسىپ وتىرعان كىسىسى شارشادى ما، اڭگىمە جالىقتىردى ما، تىسقا شىققىسى كەلدى مە - مۇندا جۇمىسى بولمايدى. ول ءوزىن ون سەگىز كيلومەتردەن شانامەن سۇيرەپ كەلە جاتقان اناسىنىڭ شارشاعانىن تۇسىنبەيتىن بالاعا ۇقسايدى. ءتىپتى وسى قىلىعىنا رەنجىگەن ادامنىڭ ءوزىن ايىپتى ەتىپ شىعارادى.

ءوز ويىنا كۇمان كەلتىرمەيدى. ۇنەمى مەنىكى عانا دۇرىس دەۋ - بارىپ تۇرعان اقىماقتىق. «ءوزىڭ بىلمە، بىلگەننىڭ ءتىلىن الما» دەگەن قارعىستىڭ ەڭ جامان ءتۇرى دەيدى ۇلكەندەر. ەشكىمنىڭ ءسوزىن قۇلاققا ىلمەۋدىڭ سوڭى جارعا اپارىپ قۇلاتۋى دا عاجاپ ەمەس. بۇل جازبا ادامدى «مەن اقىماق ەكەنمىن» دەگەن ويدا قالدىرۋ ءۇشىن ەمەس، بويداعى كەمشىلىكتەرمەن كۇرەسۋگە باعىتتاۋ ماقساتىندا جازىلدى. مۇنداي جايلار بارلىعىمىزدا دا بولادى.

Massaget.kz