سەمەيدە ادامنىڭ ءتۇرىن تانيتىن «اقىلدى» دوموفوندار ورناتىلۋدا
بۇل تۋرالى «قازاقپارات» ح ا ا ءتىلشىسى حابارلايدى.
ەندى قالا تۇرعىندارىنىڭ قاۋىپسىزدىگىن قامتاماسىز ەتۋ جانە ءومىر ساپاسىن ارتتىرۋ جاڭا تەحنيكانىڭ كومەگىمەن جۇزەگە اساتىن بولادى. تۇرعىن ۇيلەرگە ورناتىلىپ جاتقان سمارت- دوموفونداردىڭ قاراپايىم قۇرىلعىلاردان ءبىرقاتار ايىرماشىلىعى بار.
«مۇندا ارنايى سەرۆەرلىك جۇيە ورناتىلعان. 24 ساعات بويى بەينەباقىلاۋ جۇرگىزىلەدى. باقىلاۋ ىشكى ىستەر باسقارماسىنىڭ جەدەل باسقارۋ ورتالىعىنا قوسىلعاندىقتان، «SOS» باتىرماسىن باسقان كەزدە حابار قۇقىققورعاۋ ورگانىنا 3 سەكۋندتا جەتەدى. نەگىزگى جوبا اۆتورلارى تاتارستاندىق «سپۋتنيك» كومپانياسىنىڭ وكىلدەرى. ال ءبىز قازاقستانداعى وكىلىمىز»، - دەدى دوموفونداردى ورناتىپ جاتقان ج ش س ديرەكتورى تيمۋر احۋنجانوۆ.
شۇعىل كومەك شاقىرۋدان بولەك، اپپاراتتا تۇرعىنداردى اقپاراتتاندىرۋ، ولاردىڭ اراسىندا ساۋالناما جۇرگىزۋ تەتىكتەرى قاراستىرىلعان. تەك ارنايى باتىرمالاردى باسسا بولعانى.
«حابارلاندىرۋ مەن تۇرعىندار اراسىنداعى ساۋالنامانى اكىمدىكتەگى جاۋاپتى مامان بىزگە جىبەرسە، ونى بىردەن سەرۆەرگە ەنگىزەمىز. وسىلايشا تۇرعىندار مىسالى، جارىقتىڭ ۋاقىتشا وشەتىنى، سۋدىڭ توقتايتىنى نەمەسە جينالىستار بولاتىنى تۋرالى حابار الادى. ال باعاسىنا كەلسەك، ايىنا ورتاشا ەسەپپەن 500 تەڭگە بولادى»، - دەيدى تيمۋر احۋنجانوۆ.
ونىڭ ۇستىنە، «اقىلدى» دوموفوندى «گورود ەكسپەرت» موبيلدىك قوسىمشاسى ارقىلى قاشىقتىقتان باسقارۋعا بولادى.
ال ونىڭ كامەراسى كەلگەن ادامنىڭ بەت- الپەتىن جادىندا ساقتاپ قويادى. ەگەر ۇيگە بۇرىن كەلگەن ادام بولسا، ونى بىردەن تانىپ، پاتەر يەسىنە حابار بەرەدى. ءۇيدىڭ قوجايىنى تانىمايتىن ادام كەلسە دە حاباردار ەتىلىپ تۇرادى.
قازاقستان بويىنشا «اقىلدى» دوموفوندار سەمەي قالاسىنىڭ ۇيلەرىنە عانا ورناتىلۋدا. قازىر ولاردىڭ سانىن ارتتىرۋ بويىنشا جەرگىلىكتى بيلىكپەن كەلىسسوزدەر جۇرگىزىلۋدە.
