ەنەسىنىڭ تويحاناسىن مەملەكەت قارجىسىنا جىلىتقان شەنەۋنىك كەلىن جازالاندى

قاراعاندى. قازاقپارات - قاراعاندى وبلىسى اقتوعاي اۋدانىندا ەكى جىل بويى ەنەسىنىڭ تويحاناسىنىڭ كوممۋنالدىق تولەمدەرىن بيۋدجەت ەسەبىنەن تولەپ كەلگەن قىزىلاراي اۋىلدىق وكرۋگىنىڭ اكىمى شەكەر تولەپبەرگەنوۆاعا قاتىستى ىسكە شەشىم شىقتى، دەپ حابارلايدى «قازاقپارات» ح ا ا ءتىلشىسى.

بيۋدجەت قاراجاتىن جەكە مۇددەگە پايدالانعان اكىم قىزمەتىن دۇرىس اتقارماعانى ءۇشىن تارتىپتىك جازاعا تارتىلدى.

بۇدان تىس، شەنەۋنىك كەلىننىڭ ەنەسى ەكى جىلدىق مەملەكەتتىك جىلۋدىڭ اقىسىن تولەۋگە مىندەتتى.

«اكىمنىڭ ەنەسى جىلۋدىڭ قارىزىن تولىق مولشەردە تولەيتىنى تۋرالى كەلىسىم بار. ەسەپتەۋلەر ءجۇرىپ جاتىر، سوماسىن شىعارامىز. سوتقا ارىز بەرۋگە قاجەتتىلىك جوق»، - دەيدى اقتوعاي اۋدانى اكىمدىگىنىڭ ەكونوميكا جانە قارجى ءبولىمىنىڭ باسشىسى بەكەت تىلەۋبەرگەنوۆ.

شەنەۋنىك اۋدان اكىمىنىڭ تارتىپتىك جازاعا تارتۋ تۋرالى بۇيرىعىمەن تانىستى.

«ءبىز مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنىڭ ەتيكا كەڭەسىنىڭ شەكەر تولەپبەرگەنوۆانىڭ قىزمەتىنە تولىق سايكەس ەمەستىگى جونىندەگى ۇسىنىسىن ورىندادىق»، - دەيدى اقتوعاي اۋدانى اكىمى اپپاراتىنىڭ باسشىسى بەرىكبول ءومىرقاسىم.

اتالعان وقيعاعا قاراعاندى وبلىسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنىڭ قىزمەتكەرلەرى تەكسەرىس جۇرگىزگەن. ونىڭ قورىتىندىلارىن ەتيكا كەڭەسىنىڭ وتىرىسىندا دەپارتامەنتتىڭ وكىلى باقتيار ماكەيەۆ جاريالادى.

ونىڭ ايتۋىنشا، اكىمنىڭ ەنەسىنە تيەسىلى تويحانا اۋىل اكىمدىگىمەن ءبىر عيماراتتا ورنالاسقان، اۋدانى 353 شارشى مەتردى الىپ جاتىر.

دەپارتامەنت باسشىسى جاندوس سارسەنوۆتىڭ توراعالىعىمەن وتكەن ەتيكا كەڭەسىنىڭ مۇشەلەرى اكىمنىڭ وسى جەمقورلىق ارەكەتى ءۇشىن جازالاۋ قاجەتتىگى تۋرالى ۇسىنىس بەردى.

ايتا كەتەيىك، بۇعان دەيىن ەنەسىنىڭ يەلىگىندەگى تويحانانىڭ كوممۋنالدىق شىعىندارىن بيۋدجەت ەسەبىنەن تولەپ كەلگەن اۋىل اكىمىنىڭ ءىسى تەكسەرىلىپ جاتقانى تۋرالى حابارلاعان بولاتىنبىز.