قازاق كۇيلەرىن وركەسترگە لايىقتاعان ديريجەر الدابەرگەن مىرزابەكوۆ قايتىس بولدى

استانا. قازاقپارات - قازاقستاننىڭ حالىق ءارتىسى، ديريجەر، قازاق كۇيلەرىن وركەسترگە لايىقتاعان الدابەرگەن مىرزابەكوۆ ومىردەن وزدى.

بۇل تۋرالى اگەنتتىك تىلشىسىنە تەلەفون ارقىلى بەرگەن سۇحباتىندا ن. تىلەنديەۆ اتىنداعى «وتىرار سازى» اكادەميالىق فولكلورلىق- ەتنوگرافيالىق وركەسترىنىڭ ديريجەرى ءمۇسىلىم امزە ءمالىم ەتتى.

«قازاقستاننىڭ حالىق ءارتىسى، پروفەسسور، ديريجەر الدابەرگەن مىرزابەكوۆ 88 جاسقا قاراعان شاعىندا دۇنيەدەن ءوتتى. قازاق كۇي ونەرىن وركەسترگە ءتۇسىرۋدىڭ شىنايى شەبەرى، كۇي تابيعاتىن ءدوپ تانىعان اسا بىلگىر ديريجەر ەدى. قازاق وركەسترىندە «الشاعىر»، «توپان»، «جىگەر»، «قوڭىرقاز»، «ىڭعايتوك»، «جەزكيىك»، «امان بول، شەشەم» سياقتى كوپتەگەن كۇيلەردىڭ باعىن اشقان سۋرەتكەر اعامىزبەن تۇتاس ءبىر ءداۋىردىڭ پاراعى سۋسىدى. كەڭەس زامانىندا جۇرتتىڭ بارلىعى باتىس مۋزىكاسىنا دەن قويعاندا، كۇيلەردى ونىڭ ىشىندە شەرتپە كۇيلەردى تاماشا ەتىپ وركەسترگە لايىقتاعان تۇلعا ەدى. وتە ەڭبەكقور ادام بولاتىن. قازىرگى وركەسترلەردىڭ رەپەرتۋارىنداعى كۇيلەردىڭ دەنى مىرزابەكوۆ لايىقتاعان ءۇش پارتيتۋرا جيناعى نەگىزىندە وينالادى» - دەدى ءمۇسىلىم امزە.

ايتا كەتەرلىگى، بەلگىلى ديريجەر الدابەرگەن مىرزابەكوۆپەن قوشتاسۋ ءراسىمى 8 - قاڭتاردا، بەيسەنبى كۇنى ساعات 10-دا الماتى قالاسىندا جامبىل اتىنداعى قازاق مەملەكەتتىك فيلارمونياسىندا وتكىزىلەدى.

الدابەرگەن قايىربەك ۇلى 1930 -جىلى 14 - قاراشادا قاراعاندى وبلىسى جاڭاارقا اۋدانى تۇگىسكەن اۋىلىندا دۇنيەگە كەلگەن. ديريجەر، پەداگوگ، ق ر حالىق ءارتىسى (1984 -جىل)، پۋبليتسيست.

الماتى مەملەكەتتىك كونسەرۆاتورياسىنىڭ حالىق اسپاپتار فاكۋلتەتىن بىتىرگەن (1955 -جىل).

 1956 -جىلى قۇرمانعازى اتىنداعى قازاقتىڭ مەملەكەتتىك حالىق اسپاپتار وركەسترىنە ديريجەرلىك قىزمەتكە تاعايىندالىپ، 1968 - 1971 -جىلى وركەستردىڭ باس ديريجەرى ءارى كوركەمدىك جەتەكشىسى بولعان. سونداي- اق، 1971 - 1988 -جىلدار ارالىعىندا ديريجەر بولىپ ەڭبەك ەتتى.

1962 -جىلى موڭعوليانىڭ بايان- ولگەي ايماعىندا قازاق مۋزىكالىق دراما تەاترىنىڭ كوركەمدىك جەتەكشىسى جانە باس ديريجەرى مىندەتىن اتقارىپ، قازاق ۇلت اسپاپتار وركەسترىن اشۋعا، ۇجىمنىڭ ورىنداۋشىلىق، كاسىبي دەڭگەيىن كوتەرۋگە دە اتسالىسقان.

ونىڭ وركەسترگە ارناپ تۇسىرگەن تاتتىمبەتتىڭ، سۇگىردىڭ، ءاشىمتايدىڭ شەرتپە كۇيلەرى، ىقىلاستىڭ قوبىز كۇيلەرى، تاعى باسقا حالىق كومپوزيتورلارىنىڭ ءان- كۇيلەرى، ورىس جانە شەت ەل كلاسسيكتەرىنىڭ تۋىندىلارى بار.

موڭعوليانىڭ بايان ولگەي ايماعىندا قازاق مۋزىكالىق دراما تەاترىندا قويىلعان «تۇلبانور شايقاسى» سپەكتاكلىنە مۋزىكا جازدى.

مادەنيەت قايراتكەرىنىڭ ءوزىنىڭ دە ءان، كۇيلەرى، كۇردەلى ۋۆەرتيۋرا، پوەما جانرىندا جازىلعان ءتول تۋىندىلارى كوپتەپ سانالادى. مىرزابەكوۆتىڭ «قوڭىرقاز»، «كوكەيكەستى»، «جىگەر» سياقتى وركەسترگە ارنالعان پارتيتۋرا، تاڭدامالى جيناقتارى جارىق كورگەن.

اۆتور: جانىبەك امانگەلدى