دارحان قىدىرالى: الاش اسكەرىنىڭ قۇرىلعان كۇنى - مەرەكەگە اينالۋى كەرەك
«ءبىزدىڭ تاريحىمىزداعى اقتاڭداق بەتتەرى كوپ. بەرىك ءابدىعاليدىڭ كىتابى (ۆويسكو الاش - الاش اسكەرى) - سونىڭ ورنىن تولتىراتىن، ولجا سالعان سۇبەلى ەڭبەك بولدى دەپ ەسەپتەيمىز. بۇل تۋىندىنىڭ ءبىزدىڭ وقۋلىقتارىمىزعا جاڭالىق رەتىندە ەنەر تۇستارى كوپ»، - دەيدى دارحان قىدىرالى استاناداعى ۇلتتىق اكادەميالىق كىتاپحانادا وتكەن «الاش اسكەرى: تاريحتان تاعىلىم» تاقىرىبىنداعى دارىستە.
تۇركى اكادەمياسىنىڭ پرەزيدەنتى جيىندا حالىق قالاۋلىلارى مەن گەنەرالدار وتىرعاندىقتان، ەلىمىزدەگى اسكەري وقۋ ورىندارىندا «الاش اسكەرى» كىتابى وقىتىلا باستايتىنىنا ۇمىتتەنىپ وتىرعانىن جەتكىزدى.
«تۇركيانىڭ وسى جەرگە بىرنەشە وكىلى كەلىپ وتىر. تۇركيا ءوزىنىڭ قارۋلى كۇشتەرىنىڭ تاريحىنا «تۇركيا رەسپۋبليكاسىنىڭ قارۋلى كۇشتەرىنىڭ قۇرىلعانى - ءبىزدىڭ داۋىرىمىزدەن بۇرىنعى 120 جىلدارى، ياعني مودە قاعاننىڭ كەزى» دەپ جازىپ قويعان. دەمەك، تۇركيانىڭ قارۋلى كۇشتەرى ءوزىنىڭ نەگىزىن 2000 -جىلدان بۇرىن باستايدى. ءبىز كەيدە ءوزىمىزدى بۇرىنعى ادەتپەن 23 - اقپاندا قۇتتىقتاپ جاتامىز. الاش اسكەرىنىڭ قۇرىلعان كۇنى ءبىزدىڭ ارامىزدا ءبىر مەرەكەگە اينالۋى كەرەك دەگەن ءبىر ويىمىز بار»، - دەيدى ول.
دارحان قىدىرالى سونىمەن قاتار، جالپى، الاش تانۋ - الاشتىڭ 100 جىلدىعىمەن شەكتەلمەيتىنىن تىلگە تيەك ەتتى.
«الاش تانۋ تاۋەلسىزدىكپەن بىرگە باستالدى. وتاندىق تاريحىمىزدىڭ ول تاقىرىپتاعى زەرتتەۋلەرى 100 جىلدىق اياسىندا جاڭا بەلەسكە كوتەرىلدى. سوندىقتان، ءبىر جارقىن كورىنىسى - وسى كىتاپ»، - دەيدى ول.
