گازەتتىڭ ينتەرنەت- سايتىنىڭ دامۋى تيراجعا قالاي ىقپال ەتەدى
ونىڭ ايتۋىنشا، «ەگەمەن قازاقستان» گازەتىنىڭ سايتى دەربەس رەداكسيا رەتىندە جۇمىس ىستەيدى جانە باسىلىمنىڭ كەڭىرەك ناسيحاتتالۋىنا ىقپال ەتىپ وتىر.
«بىلتىر «نيۋ- يورك تايمستىڭ» ستراتەگياسىن وقىعانىم بار ەدى، سوندا گازەت باسشىلىعى ايتادى: ەگەر ينتەرنەت- رەداكسيا جاقسى جۇمىس ىستەسە، بۇل گازەتتىڭ تيراجىنىڭ كەمۋىنە ەمەس، كەرىسىنشە، اۋديتورياسىنىڭ ارتۋىنا ىقپال ەتەدى. جاپونياداعى «اساحيگە» بارعاندا دا سۇرادىق، ولار دا امەريكالىق ارىپتەستەرىنىڭ ءسوزىن قايتالادى. (.. .) ءبىزدىڭ سايتتىڭ ستراتەگياسى نەگىزىنەن جەدەل جانە سەنىمدى اقپارات تاراتۋعا باعىتتالعان. ءبىز قازىر اعىلشىن، ورىس، لاتىن جانە اراب قارپىندەگى نۇسقالارىمىزبەن رەداكسياعا ۇلكەن وقىرماندار اۋديتورياسىن تارتىپ وتىرمىز. بۇل گازەت تيراجىنىڭ كەمۋىنە ەمەس، كەرىسىنشە، وسۋىنە ىقپال ەتىپ وتىر. سەبەبى، «ەگەمەننىڭ» وزگەرگەنىن سايتتان كورىپ، گازەتىمىزگە بەت بۇرعان جاڭا وقىرماندارىمىز كوپ» ، - دەدى دارحان قىدىرالى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
دارحان قىدىرالى «ەگەمەن قازاقستان» سايتى مەن گازەتىنىڭ اقپاراتتىق ساياساتى ەكى ءتۇرلى ەكەنىن جانە ءبىرىن- ءبىرى قايتالامايتىنىن اتاپ ءوتتى.
«جالپى، زەرتتەۋلەر بىزگە ينتەرنەت- سايتتاعى ماتەريالدى ادامنىڭ 40 سەكۋندقا دەيىن عانا وقي الاتىنىن، گازەتتى 40 مينۋتقا دەيىن وقيتىنىن كورسەتتى. قاعازدى ۇستاپ وقۋ ادامنىڭ قابىلداۋىنا دا باسقاشا اسەر ەتەدى، گازەتتەن وقۋ ينتەرنەتتەن بولەك. ينتەرنەت ارقىلى كوبىنەسە جەدەل اقپارات الامىز، ال ەندى ساليقالى، ساپالى ساراپتامالاردى، قۇندى ماتەريالداردى ادامدار كوپ جاعدايدا گازەت ارقىلى وقيدى. سوندىقتان سايتىمىزدا جەدەل اقپارات تاراتۋعا، گازەتتە - قۇندىلىعىن جويمايتىن ساليقالى ساراپتامالىق ماتەريالدارعا كوبىرەك كوڭىل ءبولىپ وتىرمىز» ، - دەپ ءوز ءسوزىن تولىقتىردى ول.
اتاپ وتكەن ءجون، 2017 -جىلى «ەگەمەن قازاقستان» گازەتى تيراج سانى بويىنشا (204 مىڭ) قازاقستان باسىلىمدارى اراسىندا ەڭ جوعارى كورسەتكىشكە قول جەتكىزگەن. 2018 -جىلعا جازىلىم ناۋقانىندا - قازپوشتا بويىنشا كورسەتكىش 206 مىڭنان اسقان.
اۆتور: ايجان سەرىكجان قىزى
