ەلدىڭ باس گازەتى «ەگەمەن قازاقستان» اتاۋىن لاتىنشاعا اۋىستىرادى

استانا. قازاقپارات - «ەگەمەن قازاقستان» رەسپۋبليكالىق گازەتىنىڭ اتاۋى لاتىن الىپبيىنە اۋىستىرىلادى.

بۇل تۋرالى «ەگەمەن قازاقستان» رەسپۋبليكالىق گازەتى» ا ق باسقارما ءتوراعاسى دارحان قىدىرالى ورتالىق كوممۋنيكاتسيالار قىزمەتىندە ءمالىم ەتتى، دەپ حابارلايدى «قازاقپارات» ح ا ا ءتىلشىسى.

«ءتول جاڭا جىلىمىز - ناۋرىز مەرەكەسى قارساڭىندا وقىرماندارىمىزعا ءبىرقاتار جاقسى جاڭالىقتار ازىرلەپ وتىرمىز. ناۋرىزدان باستاپ، گازەت اتاۋىن لاتىن الىپبيىمەن شىعارامىز. گازەتتىڭ كۇندەلىكتى 12 بەتى 16 بەتكە كوبەيەدى جانە جاڭا قوسىمشالارمەن اپتاسىنا ءبىر رەت 24 بەت شىعارۋ جوسپارلانىپ وتىر»، - دەدى باسىلىم باسشىسى.

دارحان قىدىرالى سونداي-اق بريفينگ بارىسىندا تۇتاس گازەتتى لاتىن الىپبيىنە كوشىرۋ تۋرالى جۋرناليستەر سۇراعىنا جاۋاپ بەردى.

«بيىل گازەتتىڭ اتاۋى عانا لاتىن قارپىنە وزگەرەدى. تۇتاس گازەتتى كوشىرۋ ءۇشىن ەلباسى جارلىعىمەن قۇرىلعان لاتىن ءالىپبيى جونىندەگى ۇلتتىق كوميسسيانىڭ شەشىمىن كۇتۋ كەرەك. سەبەبى، تەك قانا لاتىن ءالىپبيىن قابىلداۋ جەتكىلىكسىز، ونىڭ ەملە-ەرەجەسىن بەكىتۋ كەرەك. كىرمە سوزدەر قالاي جازىلاتىنىن بەكىتۋ كەرەك. جالپى لاتىن الىپبيىنە كوشۋگە «ەگەمەن قازاقستان» گازەتى دايىن، سەبەبى بۇدان 70 جىل بۇرىن، 30-40-جىلدارى باسىلىم لاتىن قارپىندە جارىق كورگەن. سوندىقتان، گازەتتى تولىق كوشىرۋ ەش قيىندىق تۋعىزبايدى»، - دەپ جاۋاپ بەردى ول.

سونىمەن بىرگە، دارحان قىدىرالى «ەگەمەن قازاقستاننىڭ» 100 جىلدىق مەرەيتويىنا دايىندىقتىڭ باستالعانىن حابارلادى. قازىرگى ۋاقىتتا «سيفرلىق قازاقستان» باعدارلاماسى اياسىندا «ەگەمەن قازاقستان» گازەتىنىڭ 1919 -جىلدان بەرگى بارلىق نومىرلەرىن سكانەرلەپ، ەلەكتروندى فورماتقا كوشىرۋ جانە تاڭداۋلى ماقالالاردىڭ 10 تومدىق جيناعىن ازىرلەۋ جۇمىستارى ءجۇرىپ جاتىر.

«ەگەمەن قازاقستان» گازەتى العاش رەت 1919 -جىلى «ۇشقىن» اتاۋىمەن جارىق كورە باستادى. ءار جىلدارى باسىلىمدى بەرنياز كۇلەيەۆ، سماعۇل ءسادۋاقاسوۆ، جۇسىپبەك ايماۋىتوۆ، مۇحتار اۋەزوۆ، بەيىمبەت مايلين، ساكەن سەيفۋللين، تۇرار رىسقۇلوۆ، وراز جاندوسوۆ، عابيت مۇسىرەپوۆ، شەرحان مۇرتازا، ءابىش كەكىلبايەۆ سىندى ۇلتىمىزدىڭ ءبىرتۋار ازاماتتارى باسقاردى. گازەت ءوز تاريحىندا «ۇشقىننان» كەيىن «ەڭبەك تۋى»، «ەڭبەكشىل قازاق»، كەيىننەن «سوتسيالدى قازاقستان»، «سوتسياليستىك قازاقستان» اتاۋىمەن جارىققا شىقتى. ەلىمىز ەگەمەندىك العان تۇستا گازەت «ەگەمەندى قازاقستان»، ال 1993 -جىلى «ەگەمەن قازاقستان» بولىپ وزگەردى.