ماۋلەن اشىمبايەۆتىڭ دەپۋتاتتىق وكىلەتتىگى مەرزىمىنەن بۇرىن توقتاتىلدى

استانا. قازاقپارات - ءماجىلىس دەپۋتاتى ماۋلەن اشىمبايەۆتىڭ وكىلەتتىگى مەرزىمىنەن بۇرىن توقتاتىلدى.

بۇگىن پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى وسىنداي شەشىم قابىلدادى، دەپ حابارلايدى «قازاقپارات» ح ا ا ءتىلشىسى.

جالپى وتىرىسىتا اتالعان ماسەلە تۋرالى ق ر ورتالىق سايلاۋ كوميسسياسىنىڭ مۇشەسى باقىت مەلدەشوۆ ۇسىنىم ەنگىزگەن بولاتىن.

«ق ر كونستيتۋتسياسىنىڭ 52-بابى 5-تارماعىنا، «ق ر پارلامەنتى جانە ونىڭ دەپۋتاتتارى مارتەبەسى تۋرالى» 1995 -جىلعى 16 -قازانداعى كونستيتۋتسيالىق زاڭىنىڭ 24-بابى 3-تارماعىنا سايكەس جانە ورنىنان ءتۇسۋ تۋرالى ءوتىنىش نەگىزىندە ورتالىق سايلاۋ كوميسسياسى قر پارلامەنت ءماجىلىسىنىڭ دەپۋتاتى ماۋلەن ساعاتحان ۇلى اشىمبايەۆتى وكىلەتتىگىن مەرزىمىنەن بۇرىن توقتاتۋ تۋرالى شەشىم ءۇشىن ۇسىنىم ەنگىزىپ وتىر»، - دەدى باقىت مەلدەشوۆ.

بۇدان كەيىن ءماجىلىس ءتوراعاسى نۇرلان نىعماتۋلين بۇرىنعى ارىپتەسىنە ساتتىلىك تىلەپ، العىس حات تاپسىردى.

«ءبىزدىڭ ماجىلىستە كوپ جىلدار حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتوراعاسى بولىپ جۇمىس جاسادىڭىز. ماڭىزدى زاڭداردى قابىلداۋعا زور ۇلەس قوستىڭىز. سونىمەن بىرگە، پارلامەنتارالىق بايلانىستى نىعايتۋعا دا ەرەكشە ىقپال ەتتىڭىز. سوندىقتان، بارلىق دەپۋتاتتاردىڭ اتىنان سىزگە العىسىمىزدى بىلدىرەمىز. الداعى ۋاقىتتا دا پارتيالىق قىزمەتتە زور تابىستار تىلەيمىز»، - دەدى ءماجىلىس ءتوراعاسى.

ءوز كەزەگىندە ءسوز العان «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ كوپشىلىككە العىس ايتتى.

«بىرنەشە جىل وتە جاقسى، قويان- قولتىق ناتيجەلى جۇمىس ىستەدىك. سىزدەردەي ساياساتكەرلەرمەن، ماماندارمەن جۇمىس ىستەۋ مەن ءۇشىن ۇلكەن مارتەبە. ەكىنشى جاعىنان، ماجىلىستەگى جۇمىس مەن ءۇشىن كاسىبي ءارى ومىرلىك مەكتەپ بولدى. ەندى ەلباسى ءبىزدىڭ پارتيامىزداعى لاۋازىمدى قىزمەتكە تاعايىندادى. بۇل ۇلكەن جاۋاپكەرشىلىك. ەلباسىنىڭ سەنىمىن اقتاۋعا بار كۇشىمدى سالاتىن بولامىن»، - دەدى ماۋلەن اشىمبايەۆ.

ەسكە سالا كەتسەك، 1 -اقپان كۇنى ەلباسى «نۇر وتان» پارتياسى ءتوراعاسىنىڭ جاڭا ءبىرىنشى ورىنباسارىن تانىستىرعان بولاتىن.