جوعارى وقۋ ورىندارى جاتاقحانالارىنىڭ رەيتينگى جاسالادى: ستۋدەنتتەردەن فوتولار قابىلدانۋدا
وسى جىلدىڭ قاڭتار ايىنان باستاپ «جاس وتان» مەملەكەتتىك وقۋ ورىندارى جاتاقحانالارىندا تۇراتىن ستۋدەنتتەر اراسىندا الەۋمەتتىك ساۋالناما وتكىزۋدى باستادى. 10 سۇراقتان تۇراتىن ساۋالنامامەن قاتار، WhatsApp جانە Telegram جۇيەلەرىندە سۋرەتتەر مەن حاتتاردى ءانونيمدى تۇردە قابىلدايتىن سەنىم ءنومىرى ورناتىلدى.
«اكسيا باستاۋ العان العاشقى ەكى اپتادا «جاس وتان» جاستار قاناتىنىڭ ايماقتارداعى بەلسەندىلەرى «قازاقستان ستۋدەنتتەرىنىڭ اليانسىمەن» بىرلەسە وتىرىپ، ەلىمىزدىڭ 40 جوعارى وقۋ ورىندارىنا قاراستى 63 جاتاقحانانى ارالاپ، 2173 ستۋدەنتتەن جاۋاپ الدى. بۇل جاتاقحانالاردا ءار تۇرعىنعا ەسەپتەلگەن مينيمالدى(كەمى - رەد.) اۋدان كولەمىنىڭ ەرەجەرلەرگە ساي ەكەنى انىقتالدى (جاتاقحانا بولمەسىنىڭ ادام باسىنا شاققانداعى كەم دەگەندە كولەمى 6 شارشى مەتر بولۋى شارت)»، - دەلىنگەن تاراتىلعان حابارلامادا.
جاتاقحانالاردىڭ سىرتقى اۋلاسى مەن ءىشىنىڭ تازالانۋ جيىلىگىنە بايلانىستى سۇراققا 2173 ستۋدەنتتىڭ 1213 ى - «ءجيى»، 800 ى «سيرەك» دەگەن جاۋاپ قايىرعان. ال جاتاقحانالار ساپاسى بويىنشا 1410 ادام «جاقسى» دەگەن باعا بەرسە، 313 ى «ورتاشا» دەگەن. ال قالعان جاۋاپ بەرۋشىلەر جاتاقحانالار ساپاسىنا كوڭىلدەرى تولمايتىنىن ايتقان.
شىعىس قازاقستان وبلىسىنىڭ بىرنەشە وقۋ ورنىندا سانيتارلىق ەرەجەلەردىڭ بۇزىلۋ فاكتىلەرى تىركەلگەن. جۋىنۋ بولمەلەرىنىڭ ناشار جاعدايى، كۇردەلى جوندەۋ جۇمىستارىنىڭ قاجەتتىلىگى، اس بولمەلەرىنىڭ تازالىق دەڭگەيىنىڭ تومەندىگى سەكىلدى ماسەلەلەر انىقتالدى.
اكسيانى جۇزەگە اسىرۋ بارىسىندا كوتەرىلگەن ماڭىزدى ماسەلەلەردىڭ ءبىرى - جاتاقحانا جەتىسپەۋشىلىگى. باتىس قازاقستان اگرارلىق-تەحنيكالىق ۋنيۆەرسيتەتىنىڭ وزىندە 370 ستۋدەنت جاتاقحاناعا مۇقتاج. ال وڭتۇستىك قازاقستاندا 23 ستۋدەنتكە جاتاقحانادا ورىن تابىلماعان.
«ۇيىمداستىرۋشىلار جاتاقحاناعا مۇقتاج ستۋدەنتتەر سانى كورسەتىلگەننەن الدەقايدا جوعارى ەكەنىنە سەنىمدى. سوندىقتان جاسوتاندىقتار جاستاردان وقۋ باعاسىنا اسەر ەتۋى مۇمكىندىگىنەن نەمەسە ۋنيۆەرسيتەتتە ءتۇرلى كەدەرگىلەرگە تاپ بولۋدان ەش قورقىنىشسىز ساۋالنامالارعا جاۋاپ بەرۋلەرىن سۇرايدى. شارا جىل بويى جالعاسىن تابادى»، - دەپ اتاپ ءوتتى «جاس وتاننان».
