قازاق قىزى موڭعوليادا كەلىندەر بايگەسىنە قاتىسىپ جاتىر

 استانا. قازاقپارات - قازاقستاندىق بويجەتكەن موڭعوليادا «ماناي بەر» («ءبىزدىڭ كەلىن») جوباسىنا قاتىسىپ جاتىر. قازاق قىزىنان بولەك، اتالعان سايىستا امەريكالىق، جاپون جانە بۋرياتيالىق قىز باعىن سىناۋدا.

شەتەلدىك ءتورت ارۋ 200 قىزدىڭ ىشىنەن ىرىكتەلىپ الىنعان. بۇل تۋرالى asiarussia.ru-عا سىلتەپ Stan.kz حابارلايدى.

ايتا كەتەتىن جايت، قاتىسۋشىلاردىڭ ءبارى موڭعول ازاماتىنا تۇرمىسقا شىققان. موڭعوليانىڭ ۇلتتىق تەلەارناسى 5 كۇن بويى، اتاپ ايتقاندا 20-24 قاڭتار ارالىعىندا قاتىسۋشىلاردىڭ ءۇيى مەن جۇمىسىندا قوناقتا بولىپ قايتتى.

رەاليتي- شوۋدىڭ ماقساتى - شەتەلدىك قىزداردىڭ موڭعول داستۇرلەرىن، مادەنيەتىن قانشالىقتى مەڭگەرگەنىن تەكسەرۋ.

العاشقى ءبولىم ناتيجەسى بويىنشا قازاق قىزى تۇرسىن ساتقانوۆا ۇزدىك دەپ تانىلعان. الايدا بۇل تاڭعالاتىن جايت ەمەس، دەيدى كورەرمەندەر. سەبەبى بويجەتكەن موڭعولياعا وسىدان 22 جىل بۇرىن كوشىپ كەلگەن. حۋبسۋگۋل ايماعىندا موڭعول كۇيەۋىمەن جانە 5 بالاسىمەن بىرگە تۇراتىن امەريكالىق قىز دا موڭعول ءتىلىن جەتىك بىلەتىن بولىپ شىقتى. ول ءبىر كەزدەرى كۇيەۋى گانبات سەزىمىن بىلدىرگەندە ىڭعايسىزدانعانىن، سەبەبى ونى دوس رەتىندە قابىلداعانىن اتاپ ءوتتى.

ال جپون بالەريناسى مينا تامۋرا ءتىلدى بارىنەن دە تەز جاتتاپ العان. بايانحونگور ايماعىنىڭ اتىنان قاتىسىپ جاتقان بويجەتكەن نەبارى 2  جىلدا كۇيەۋىنىڭ ءتىلىن جاقسى مەڭگەرگەن.

ال بۋريات قىزى دونارا بالدانتسەرەن ازىرگە تەك ورىس تىلىندە سويلەيتىن بولىپ شىقتى.