ساپاربايەۆ ورىنباسارىنا: ۇيىقتاساڭ، ۇيىقتايتىن جەرگە باراسىڭ

اقتوبە. قازاقپارات - اقتوبەدە كولىك ينفراقۇرىلىمىن دامىتۋعا ارنالعان جيىن بولدى. «اقتوبە- اتىراۋ» تاسجولىن سالۋدا جەرگىلىكتى قۇرىلىس ماتەريالىن پايدالانىپ، دايىندىقتى كۇشەيتۋدى قاداعالاعان وبلىس اكىمى بەردىبەك ساپاربايەۆ ورىنباسارلارىنا ۇيىقتاماي جۇمىس ىستەۋدى تاپسىردى،

 دەپ حابارلايدى قازاقپارات ءتىلشىسى.

بيىل «اقتوبە- اتىراۋ» تاسجولى سالىنادى. قازىرگى كەزدە ەكى ءىرى مەردىگەر كومپانيا انىقتالىپ، ولار جەرگىلىكتى قۇرىلىس ماتەريالىن وندىرۋشىلەرمەن كەلىسىمشارتقا وتىرىپ جاتىر. قيىرشىق تاس، قۇم سەكىلدى ماتەريالداردىڭ ءبارى اقتوبەدەن الىنادى. سونىمەن قاتار، بايعانين اۋدانىنىڭ قاراۋىلكەلدى، نوعايتى، تەمىر اۋدانىنىڭ جاقسىماي اۋىلىندا تەمىرجول تۇيىعى پايدالانىلادى. ياعني، قۇرىلىس ماتەريالدارى شالقار اۋدانى، اقتوبە قالاسىنان تەمىرجول ارقىلى تاسىمالدانادى.

«الدا ۇلكەن جۇمىس كۇتىپ جاتىر. ءبىز بەن ءسىز بار بولعانى 2 ايدىڭ ىشىندە بارلىق قۇرىلىس ماتەريالىن دايىنداپ ۇلگەرۋىمىز كەرەك. ساۋىردە قۇرىلىس باستالادى. جول سالۋشىلار قىستا بارلىق ماتەريالدى جيناپ، تەحنيكانى تۇگەندەۋ كەرەك. ال ۋاقىتى كەلگەندە ءبارىن كەدەرگىسىز باستاعان ءجون. بىزدە جول سالۋشىلار جەتىسپەيدى. ال مەملەكەتتىك ساتىپ الۋ كەش وتكىزىلەدى. سوندىقتان مەردىگەر كومپانيالار ءوز قارجىسىمەن جۇمىستى باستاپ كەتكەنى ءجون. ءبىز سىزدەردى ەشۋاقىتتا الدامايمىز، قارجى بولىنەدى»، - دەدى اقتوبە وبلىسىنىڭ اكىمى بەردىبەك ساپاربايەۆ.

  بۇعان دەيىن حابارلاعانىمىزداي، «اقتوبە- اتىراۋ» جولىن سالۋعان ازيا دامۋ بانكىنەن قارجى اۋدارىلادى. ەكى ءىرى مەردىگەر كومپانيا انىقتالىپ، ازەربايجان مەن يتاليا كومپانيالارى جەڭىمپاز اتاندى. جول قۇرىلىسى كەزىندە 780 مىڭ توننا قيىرشىق تاس قاجەت بولادى. قازىرگى كەزدە تاس ۇنتاقتاۋ قۇرالدارى كەن ورىندارىنا قۇرىلىپ، جۇمىس باستالدى. ءىرى قۇرىلىس جۇمىسى باستالعان كەزدە قيىندىقتار تۋىنداپ وتىر. اقتوبە وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ايازباي وسمانعاليەۆتىڭ ايتۋىنشا، وڭىردە قيىرشىق تاس باعاسى قىمباتتاپ كەتكەن.

«كەن بار، باياعى جۇمىس اتقارىلىپ جاتىر. نەگە باعا كوتەرىلدى؟ باعانى رەتتەيتىن ارنايى دەپارتامەنتكە تاپسىرما بەرىپ، قيىرشىق تاس باعاسىن تەكسەرۋدى تاپسىرامىن. ال اقتوبەدە شىعارىلاتىن قيىرشىق تاس الدىمەن جەرگىلىكتى قاجەتتىلىكتى وتەۋى ءتيىس»، - دەدى ب. ساپاربايەۆ.

جيىن كەزىندە ءوڭىر باسشىسى ءوز ورىنباسارى سەرىك تولەنبەرگەنوۆتىڭ جۇمىسىن سىنادى. حالىقارالىق اۋەجايى بار اقتوبەدە شەتەلگە ۇشاتىن ەكى عانا اۋە رەيسى بار.

«جۇمىس كوپ، ال سەن وتىرسىڭ «ۇيىقتاپ». ازىرگە ەشتەڭە جاساپ جاتقان جوقسىڭ. ۇيىقتاساڭ، ۇيىقتايتىن جەرگە باراسىڭ»، - دەدى ءوڭىر باسشىسى.

اۆتور: التىناي ساعىندىقوۆا